ВЕСТИМАКЕДОНИЈАТРЕНД

116 години од раѓањето на Мајка Тереза: Од Скопје до Нобеловата награда и светски симбол на милосрдието

На денешен ден, 26 август 1910 година, во Скопје е родена Агнес Гонџа Бојаџиу, подоцна позната во целиот свет како Мајка Тереза. Денес се навршуваат 116 години од раѓањето на нобеловката и хуманитарка која животот го посвети на најсиромашните и најотфрлените. Официјалната биографија на Нобеловата фондација потврдува дека е родена во Скопје, а била крстена еден ден подоцна, на 27 август 1910 година.

„Светот денес е гладен не само за леб, туку и за љубов, да биде посакуван, да биде сакан“, е една од пораките што се поврзуваат со нејзиното учење и мисија. Нејзината работа со луѓето на маргините ја претвори скопјанката од албанско католичко семејство во една од најпрепознатливите хуманитарни личности на 20 век.

Мајка Тереза го напуштила родното Скопје на 18-годишна возраст и во 1928 година се приклучила на Сестрите од Лорето во Ирска, по што заминала во Индија. Долги години работела како наставничка во Калкута, но во 1946 година го доживеала она што самата го нарекувала „повик во повикот“ – одлуката целосно да се посвети на сиромашните, болните и напуштените.

Во 1950 година ја основала конгрегацијата „Мисионерки на милосрдието“, која со текот на времето прераснала во глобална мрежа за грижа за сиромашни, бездомници, болни и луѓе на кои им е потребна поддршка. До нејзината смрт во 1997 година, конгрегацијата имала 3.842 сестри во 594 куќи во 120 земји, според официјалната биографија на Ватикан.

Нобелова награда за „помош на човештвото што страда“

Во 1979 година Мајка Тереза ја доби Нобеловата награда за мир. Норвешкиот Нобелов комитет ја награди „за нејзината работа во пружањето помош на човештвото што страда“, посебно истакнувајќи ја нејзината грижа за децата, бегалците и најранливите.

Во говорот при доделувањето на наградата беше нагласено дека нејзината работа ги надминала границите на националноста, расата и религијата и дека нејзиниот пристап ја потврдува неприкосновеноста на човечкото достоинство.

Мајка Тереза почина на 5 септември 1997 година во Калкута, на 87-годишна возраст. Процесот за нејзино прогласување за светица започна две години подоцна. Во 2003 година папата Јован Павле Втори ја прогласи за блажена, а на 4 септември 2016 година папата Франциск ја канонизираше како Света Тереза од Калкута.

Иако најголемиот дел од својот живот го помина во Индија, Скопје останува неразделен дел од нејзината биографија. Тука го поминала детството и младоста, пред патот што ја одведе кон Калкута и ја претвори во една од најпознатите хуманитарни фигури на современата историја.

На 116-годишнината од нејзиното раѓање, нејзината порака за човечката потреба од љубов, достоинство и грижа за другиот останува актуелна во свет во кој материјалната сиромаштија е само еден од облиците на човечкото страдање.

Back to top button