ВЕСТИСВЕТ

Башар ал Асад и неговиот брат осудени на смрт во отсуство во Сирија [ВИДЕО]

Поранешниот сириски претседател Башар ал Асад и неговиот помлад брат Махер ал Асад денеска се осудени на смрт во отсуство за воени злосторства и злосторства против човештвото извршени за време на 14-годишниот конфликт во Сирија, објави Асошиејтед прес. Пресудите ги изрече Четвртиот кривичен суд во Дамаск и претставуваат први судски пресуди против Асад и членови на неговиот најтесен круг по падот на режимот пред 20 месеци.

„Башар Асад ги користеше државните институции за извршување воени злосторства и злосторства против човештвото“, изјавил судијата Фахредин ал Аријан за време на рочиштето, кое било пренесувано во живо на сириската државна телевизија.

Во истиот предмет на смрт е осуден и Атеф Наџиб, роднина на Башар ал Асад по мајчина линија и поранешен висок функционер на сириските безбедносни служби. Наџиб бил началник на огранокот на Политичката безбедност во јужната провинција Дара во 2011 година и е поврзуван со репресијата што се смета за една од непосредните искри за почетокот на масовното востание против власта на Асад.

За разлика од браќата Асад, Наџиб е во притвор и присуствувал на изрекувањето на пресудата. Под засилено обезбедување тој стоел во судска клетка во затворска униформа додека судијата ја читал одлуката, а пред судот во центарот на Дамаск се собрале граѓани кои го следеле исходот од процесот.

Случајот од Дара во центарот на процесот

Настаните во Дара во 2011 година имаат клучно место во обвинението. Повеќе од десетина тинејџери тогаш биле приведени откако испишале антивладини графити на училишен ѕид. Нивното апсење и тортура предизвикале масовни протести, на кои безбедносните сили одговориле со жестока репресија. Немирите потоа прераснале во граѓанска војна што траеше 14 години и во која, според проценките наведени од АП, загинале околу половина милион луѓе.

Сириските власти уште во септември минатата година издадоа налог за апсење на Башар ал Асад во врска со настаните во Дара, со обвиненија што вклучуваа намерно убиство, тортура со смртни последици и незаконско лишување од слобода.

Асад и неговиот брат остануваат во Русија

Башар и Махер ал Асад избегаа во Русија по падот на владата во декември 2024 година и таму добија политички азил. Новите сириски власти побараа од Москва да ги предаде, но досега нема индикации дека Русија ќе се согласи со екстрадиција.

Махер ал Асад беше командант на Четвртата оклопна дивизија, една од најмоќните формации на сириската армија. Сириските опозициски организации со години ја обвинуваа дивизијата за убиства, тортура, изнудување, нелегална трговија и управување со сопствени центри за притвор.

Денешната пресуда има силна симболична тежина за постасадовска Сирија. Сириската мрежа за човекови права претходно оцени дека самото судење во отсуство има значење затоа што поранешниот претседател, кој со години имаше речиси неограничена моќ, за првпат се појавува во домашниот правен систем како обвинет за систематски злосторства.

Сепак, практичното спроведување на пресудите против Башар и Махер ал Асад ќе зависи од тоа дали тие некогаш ќе бидат предадени на сириските власти. Додека остануваат под руска заштита, судската одлука засега има пред сè правно и политичко значење во процесот на барање одговорност за злосторствата извршени за време на сириската војна.

Back to top button