ВЕСТИИМПУЛССВЕТ
Во тренд

Катастрофални поплави на границата Непал–Тибет: Најмалку 98 загинати, стотици исчезнати [ВИДЕО]

Најмалку 98 лица загинаа, а стотици се водат како исчезнати по катастрофалните поројни поплави што денеска го погодија пограничниот регион меѓу Непал и кинески Тибет, објави Ројтерс. Според последните податоци, 95 жртви се регистрирани во Непал, а уште три во Тибет, додека властите предупредуваат дека бројот може значително да се зголеми.

Катастрофата започнала откако огромна маса од кал, карпи и мраз се урнала во хималајскиот регион, предизвикувајќи нагло надоаѓање на водата во реката Бхоте Коши. Прелиминарните проценки укажуваат дека земјотрес можеби предизвикал ледено-карпеста лавина во поширокото подрачје, иако точната причина сè уште се истражува.

Снимките од погодените области покажуваат огромни бранови од каллива вода што носат куќи, автомобили, мостови и делови од патишта. Ројтерс објави дека цели населби покрај реката биле збришани, а спасувачките операции се сериозно отежнати поради високото ниво на водата и уништената инфраструктура.

ВОЗНЕМИРУВАЧКО ВИДЕО❗

Особено загрижувачки е бројот на исчезнати туристи. Според кабинетот на непалскиот премиер, 484 туристи се водат како исчезнати, од кои 391 се странски државјани, а 93 се Непалци. Меѓу исчезнатите има државјани на Индија, САД, Велика Британија и други земји. Дополнително, најмалку 85 припадници на армијата и полицијата се без контакт. Бројот на исчезнати локални жители сè уште не е утврден.

Во погодените области досега се оштетени најмалку 19 мостови и околу 40 километри патишта, а сериозно се погодени и хидроенергетски објекти. Според непалското Министерство за енергетика, околу 430 мегавати производствен капацитет се надвор од функција, што е повеќе од 12 проценти од вкупниот хидроенергетски капацитет на земјата.

Спасувачките тимови продолжуваат со потрагата по исчезнатите, но во некои од најтешко погодените места хеликоптерите не можат да слетаат поради надојдените реки. Дел од повредените се пренесени во болници во регионот и во Катманду, каде семејствата ги проверуваат списоците со хоспитализирани лица.

Непалскиот премиер Балендра Шах нареди целосна мобилизација на полицијата, армијата и спасувачките служби и ги повика жителите во пониските делови долж реките веднаш да се евакуираат на побезбедни места.

Помош понудија и странски држави и меѓународни институции. Индискиот премиер Нарендра Моди соопшти дека Индија е подготвена да обезбеди целосна хуманитарна помош, додека претседателката на Европската комисија Урсула фон дер Лајен објави дека е активиран сателитскиот систем „Коперникус“ за мапирање на погодените области и поддршка на спасувачките операции.

На кинеската страна од границата, властите соопштија дека најмалку три лица загинале, а повеќе од 260 се водат како исчезнати во округот Гјиронг. Кинескиот претседател Си Џинпинг нареди „сеопфатна“ спасувачка операција и засилено следење на регионот поради опасност од нови свлечишта и секундарни поплави.

Регионот и претходно беше погоден од слични катастрофи. Минатата година поројна поплава на истата река однесе девет животи и уништи мост што ги поврзува Непал и Кина, а подоцна беше утврдено дека била предизвикана од нагло празнење на глацијално езеро во Тибет.

Back to top button