
Киев повторно беше цел на масовен руски воздушен напад во текот на ноќта, при што загинаа најмалку три лица, а десетици други се повредени, соопштија украинските власти.
Според информациите објавени од Ројтерс, руските сили лансирале комбинација од дронови и ракети врз украинската престолнина само неколку часа по завршувањето на посетата на американските мировни пратеници Џаред Кушнер и Стив Виткоф. Нападот предизвикал пожари и значителна материјална штета во повеќе делови на градот.
Градоначалникот на Киев, Виталиј Кличко, соопшти дека меѓу погодените објекти има станбени висококатници, училиште, клиника, студентски дом и магацини. Украинските служби за итни случаи интервенирале на повеќе локации, а спасувачите извлекувале луѓе заробени во оштетени згради.
Украинските воздухопловни сили тврдат дека успеале да соборат голем дел од руските дронови и крстосувачки ракети, но предупредија дека балистичките ракети и натаму претставуваат сериозна закана поради ограничените капацитети за нивно пресретнување. Претседателот Володимир Зеленски повторно ги повика западните сојузници да ја забрзаат испораката на системи за противвоздушна одбрана и ракети-пресретнувачи.
Руското Министерство за одбрана соопшти дека нападите биле насочени кон воени и логистички цели во Киев и околината, додека украинските власти тврдат дека повторно била погодена цивилна инфраструктура.
Нападот означува крај на краткиот период на намалени воздушни удари што беше забележан за време на посетата на американските посредници, кои изминатиот викенд разговараа и со украинскиот претседател Зеленски и со рускиот претседател Владимир Путин во обид да се придвижат мировните напори. И покрај дипломатските контакти, борбите и воздушните напади продолжуваат со несмален интензитет.
