Непрофитната организација „Fermi Explorer Mission“ објави амбициозен план за испраќање на првото човечко летало кое намерно ќе биде насочено кон друг ѕвезден систем – Алфа Кентаур, најблискиот сосед на Сончевиот систем.
Според објавата на Space.com, мисијата има цел да биде лансирана до крајот на 2029 година, а патувањето до целта би траело околу 80.000 години. Иако ниту една генерација што ќе ја започне мисијата нема да биде жива кога леталото ќе стигне до својата дестинација, иницијаторите велат дека токму тоа е суштината на проектот – да се направи првиот чекор кон меѓуѕвездените патувања со технологија што веќе постои.
Алфа Кентаур се наоѓа на околу 4,4 светлосни години од Земјата и претставува најблискиот ѕвезден систем до нас. За разлика од досегашните меѓуѕвездени летала како „Војаџер 1“ и „Војаџер 2“, кои се движат низ меѓуѕвездениот простор без конкретна цел, новата сонда ќе биде првиот објект дизајниран и лансиран со намера да стигне до друг ѕвезден систем.
Планираното летало ќе тежи меѓу 100 и 200 килограми и ќе носи најмалку еден килограм научен или симболичен товар. Целиот проект, вклучувајќи го развојот, изградбата, лансирањето и управувањето со мисијата, треба да чини помалку од 15 милиони долари.
Тимот зад проектот не се потпира на футуристички технологии како ласерски погони или мотори кои сè уште не постојат. Наместо тоа, планира да користи проверен електричен погон и серија маневри околу Сонцето за постепено зголемување на брзината на леталото.
Основачот на проектот, Филип Џонстон, изјави дека мисијата има и филозофска димензија поврзана со т.н. Фермиев парадокс – прашањето зошто човештвото сè уште не пронашло докази за постоење на други интелигентни цивилизации во галаксијата. Според него, проектот треба да покаже дека меѓуѕвездените патувања не мора да бидат резервирани само за далечната иднина и дека првиот чекор може да се направи уште денес.
Доколку планот биде реализиран, леталото ќе работи активно околу 12 години, по што ќе продолжи да патува самостојно низ меѓуѕвездениот простор во наредните десетици илјади години.










