
СДСМ денеска ја поздрави иницијативата на Либерално-демократската партија (ЛДП) и побара итно враќање на предлог-законот за ограничување на двојното државјанство на функционерите во собраниска процедура. Законот мора да важи подеднакво за сите носители на јавни функции, вклучително и за актуелните пратеници, министри и директори, бидејќи владејачкото мнозинство намерно го чува документот заглавен во фиока, се наведува во денешното соопштение од СДСМ.
Од партијата потсетуваат дека тие веќе имаат поднесено предлог-закон со кој се бара забрана за двојно државјанство без никакви исклучоци и половични решенија. Според нивниот предлог, ограничувањето треба строго да ги опфати пратениците од актуелниот состав, министрите, владините функционери и директорите на јавните претпријатија. Од СДСМ оценуваат дека нема место за функционери кои земаат плата од државата, а имаат поделена лојалност, порачувајќи дека вистинскиот патриотизам се докажува со лојалност исклучиво кон Македонија.
Во партиската реакција беа упатени и остри критики кон одредени претставници на власта. Со доза на иронија, од опозициската партија обвинија дека законот очигледно не може да важи за вицепремиерот Иван Стоиљковиќ, за, како што велат, неговите колеги од БИА што го слават Ратко Младиќ и за началникот на медиумите Латас. Според наводите во соопштението на СДСМ, на овие лица им е неопходно двојното државјанство за да можат непречено да ја спроведуваат српската и руската агенда, барајќи од власта веднаш да го стави законот на дневен ред и да го изгласа без компромиси.
