
Политичките партии ги официјализираа своите кандидати за претстојните предвремени локални избори за градоначалник на Општина Брвеница, кои ќе се одржат на 18 октомври годинава. Засега, според официјалните објави на политичките партии, трката за градоначалничката фотелја ќе се води меѓу претставниците на ВМРО-ДПМНЕ, СДСМ, ВЛЕН и ДУИ.
Кандидат на владејачката ВМРО-ДПМНЕ е Стојанчо Радичевски, магистер по граѓанско право и актуелен претседател на Општинскиот комитет на партијата во Брвеница. Од партијата очекуваат обединување на прогресивните сили, оценувајќи го Радичевски како чесно и искрено решение за иднината на општината. Опозициската СДСМ ќе настапи со Јовица Радески, ветеринар и актуелен носител на нивната советничка листа. Од партијата истакнуваат дека тој доаѓа од приватниот сектор, секојдневно е меѓу граѓаните и одблиску ги познава локалните проблеми, за кои нуди конкретни решенија.
Коалицијата ВЛЕН ја објави кандидатурата на Јакуп Хусеини, кој е магистер по правни науки и актуелен државен службеник во Општина Брвеница. Неговата главна предност, според партијата, е непосредното познавање на администрацијата и процедурите, што му овозможува веднаш да започне со работа во служба на жителите. Демократската унија за интеграција (ДУИ) во изборната трка влегува со Аркин Јахији. Од ДУИ нагласуваат дека неговата кандидатура претставува визија за создавање поразвиена и достоинствена Брвеница, ветувајќи конкретни инвестиции и еднакви можности за сите населени места.




