ВЕСТИПОЛИТИКА

ВЛЕН: Аферата со канализацијата во Зајас добива нова димензија, дали трагата води до снаата на Али Ахмети?

Коалицијата ВЛЕН соопшти нови детали околу, како што го нарекуваат, коруптивниот скандал со пропаднатиот проект за изградба на канализација во Кичево и Зајас. Според нивните информации, досега беше познато дека Финансиската полиција поднела кривична пријава поради сомневања за сериозни злоупотреби со кои на државата ѝ е нанесена штета од над 127 милиони денари и се изгубени речиси 9,5 милиони евра европски средства. Меѓутоа, аферата сега добива нова димензија со отворањето на прашањето за домашните компании кои биле вклучени во реализацијата на проектот, се наведува во официјалното соопштение од прес-конференцијата на Даут Беќири од коалицијата ВЛЕН.

Од ВЛЕН истакнуваат дека располагаат со конкретни договори за соработка кои покажуваат дека азербејџанската компанија „Акелик“, која била главен изведувач, склучувала наменски договори со шест домашни фирми, и тоа: „РАГ Компани“, „Перпарими“, „ОЗ & АЛ Транс“, „Кими Ибра“, „Еуро Бодени-Хит“ и „Бибај“. Опозициската коалиција јавно се сомнева дали овие правни субјекти се случајно ангажирани или пак се дел од поширока, однапред разработена деловна мрежа поврзана директно со семејството на лидерот на ДУИ, Али Ахмети.

Јавен повик до Финансиската полиција и Обвинителството за проширување на истрагата

Поради сериозноста на пронајдените договори, од коалицијата ВЛЕН упатија официјално барање до надлежните правосудни и истражни органи за итно постапување и одговори на неколку клучни прашања.

„Дали Финансиската полиција и Јавното обвинителство ќе проверат дали постои деловна поврзаност меѓу Егзона Ризмани, снаата на Али Ахмети, и компаниите што биле ангажирани од ‘Акелик’? Кој ги предложил и кој одлучил токму овие компании да бидат ангажирани во проект финансиран со европски и државни средства, колку пари биле исплатени на секоја од нив и дали истрагата ќе биде проширена врз целата мрежа? Ако постои поврзаност, тогаш јавноста има право да знае дали европските милиони и парите на граѓаните завршиле во мрежа на компании поврзани со семејството Ахмети“, изјави Даут Беќири.

На крајот од своето излагање, претставникот на ВЛЕН потенцираше дека и покрај потрошените огромни финансиски средства, канализација на терен сè уште нема, а европските милиони се неповратно изгубени. Тој заклучи дека институциите имаат законска обврска пред граѓаните докрај да ја расчистат оваа голема инфраструктурна афера и јавно да соопштат каде точно завршиле државните и европските пари.

Back to top button