ВЕСТИСВЕТ

Осуденичката што ја преживеа смртоносната инјекција се освести и почна да зборува

Осуденичката на смрт Криста Пајк, која минатата недела го преживеа обидот за егзекуција со смртоносна инјекција во американската сојузна држава Тенеси, се освести и комуницира. Ова беше прв обид за погубување жена во оваа држава во последните два века, пренесува агенцијата Ројтерс.

Педесетгодишната Пајк сè уште е врзана со лисици и пранги за болничкиот кревет каде што прима медицинска нега, по тешките повреди на рацете настанати при неуспешното ставање на интравенозните линии за време на прекинатата егзекуција. Нејзините адвокати истакнуваат дека медицинската прогноза останува нејасна, но се очекува долго закрепнување. Тие побараа судска наредба за зачувување на доказите од неуспешната егзекуција, тврдејќи дека Одделот за корекции во Тенеси ги прекршил нејзините уставни права подложувајќи ја на сурова и невообичаена казна.

Жена од Тенеси преживеа две смртоносни инјекции, егзекуцијата прекината по 40 минути агонија

Обидот за егзекуција на 30 септември траел околу два и пол часа, при што персоналот се мачел да ѝ даде две дози пентобарбитал. Поради грешката при поставувањето на интравенозните линии, високо алкалната супстанца навлегла во ткивата под кожата, оставајќи ги нејзините раце отечени, изгорени и со плускавци. По инцидентот, гувернерот Бил Ли ги суспендираше сите закажани егзекуции до крајот на годината и нареди независна ревизија, додека комесарот на Одделот за корекции, Френк Страда, најави оставка. Со ова, Пајк стана првата личност во САД за која е познато дека преживеала откако ѝ биле администрирани лекови за егзекуција.

Пајк е осудена на смрт за нејзината улога во мачењето и убиството на 19-годишната соученичка Колин Слемер во 1995 година, кога имала 18 години. Пред обидот за погубување, гувернерот го отфрли барањето за помилување, во кое нејзината одбрана тврдеше дека смртната казна не ја зела предвид нејзината лична траума од детството како жртва на сексуална злоупотреба, занемарување и нелекувана ментална болест.

Back to top button