Кос предлага ограничување на ветото во ЕУ, Мицкоски гледа потврда за македонските аргументи

Европската унија подготвува значајни промени во политиката на проширување, со кои би се ограничила можноста земјите членки да го користат правото на вето за билатерални спорови, а земјите кандидати би добиле можност за постепена интеграција уште пред полноправното членство. Предлозите ги претстави еврокомесарката за проширување Марта Кос во рамки на пакетот реформи со кои Брисел сака да ја подготви Унијата за прием на нови членки.
Еден од најзабележаните предлози е идните членки доброволно да се обврзат дека нема да го користат ветото за решавање билатерални прашања поврзани со други кандидати за членство. Кос оцени дека сегашниот систем овозможува национални спорови да го блокираат процесот на проширување и да ја намалат геополитичката тежина на Унијата.
Паралелно, Европската комисија предлага и поширока примена на квалификувано мнозинство во одредени области наместо едногласно одлучување, како и постепено вклучување на кандидатите во европските политики и делови од единствениот пазар пред формалното членство.
Во пакетот се содржани и нови заштитни механизми за идните членки. Според предлогот, новопримените држави би поминувале транзициски период до 15 години, во кој би можеле да се соочат со ограничување на одредени права, па дури и со суспензија на гласачките права доколку сериозно ги прекршуваат владеењето на правото и основните европски вредности. Кос порача дека целта е да нема повторување на ситуациите кои во минатото создадоа блокади во функционирањето на Унијата.
Премиерот Христијан Мицкоски ги поздрави најавите од Брисел, оценувајќи дека Европската унија конечно препознава дека ветото било злоупотребувано за прашања кои не се дел од европските критериуми.
„ЕУ ја препозна злоупотребата на ветото од одредени земји членки“, изјави Мицкоски, посочувајќи дека Македонија со години предупредува оти билатералните спорови не смеат да бидат пречка за европската интеграција. Според него, новиот пристап претставува индиректна потврда на ставовите што Скопје долго време ги застапуваше во однос на бугарските блокади.
Мицкоски истакна и дека Македонија има добра почетна позиција доколку Брисел го примени моделот на постепена интеграција. Според него, државата веќе е високо усогласена со заедничката надворешна и безбедносна политика на ЕУ и работи на исполнување на дополнителните критериуми што би овозможиле порано вклучување во европските политики и фондови.
Предлозите на Европската комисија допрва ќе бидат предмет на разговори меѓу земјите членки, а за дел од нив ќе биде потребна согласност од сите влади во Унијата. Сепак, самото отворање на дебатата за ограничување на билатералните блокади веќе се оценува како една од најзначајните институционални промени во европската политика на проширување во последните години.
