
Пратеникот на СДСМ, Оливер Спасовски, на денешната собраниска седница за пратенички прашања упати две прашања до министерот за заштита на животната средина и просторно планирање, Мухамед Хоџа, кои се однесуваат на доцнењето на изградбата на регионалната санитарна депонија за Североисточниот плански регион и проблемите со ископот на песок во кумановското село Шупли Камен.
Во однос на депонијата „Краста“, Спасовски посочи дека долгогодишното отсуство на соодветно санитарно решение предизвикува повторливи пожари, загадување на воздухот и загрозување на здравјето на локалното население, особено на жителите од населените места Пчиња, Студена Бара, Вакав и Винце. Тој упати критики до градоначалникот на Куманово за, како што рече, префрлање на одговорноста, и побара од министерот конкретен одговор до каде е тендерската постапка и кога ќе започне изградбата на новата регионалната депонија и санацијата на постојната.
Второто прашање се однесуваше на ископот на песок и уредувањето на речното корито во Шупли Камен, при што Спасовски пренесе дека локалното население предупредува на пресушени бунари и нарушување на природниот тек на реката поради овие активности. Пратеникот побара информации дали надлежниот инспекторат извршил увид, какви се наодите и дали активностите се спроведуваат во согласност со стандардите за заштита на животната средина, нагласувајќи ја потребата институциите навремено да постапуваат, наместо проблемите да се решаваат по реакции и протести на граѓаните.
