ВЕСТИМАГАЗИН
Во тренд

Филмско бегство од затвор во Њу Орлеанс: Домарот осуден, поранешната шерифка со 30 обвиненија

Домарот Стерлинг Вилијамс доби затворска казна за бегството на 10 затвореници во Њу Орлеанс. Поранешната шерифка се соочува со 30 обвиненија.

Затворски домар во Њу Орлеанс доби казна од две и пол години затвор поради својата улога во бегството на 10 затвореници во мај минатата година, во случај што отвори сериозни прашања за безбедноста и управувањето со затворскиот систем. Во меѓувреме, поранешната шерифка Сузан Хатсон се соочува со 30 точки од обвинението поврзани со скандалот, објави Асошиејтед прес.

Стерлинг Вилијамс (34), кој работел како домар во затворот во Њу Орлеанс, се изјаснил за виновен по едно обвинение за злоупотреба на службената положба. Покрај казната од две и пол години затвор, му се изречени уште две и пол години условно суспендирана казна и три години условна слобода.

Според обвинението, Вилијамс го исклучил доводот на вода во ќелијата во која затворениците пријавиле проблем со тоалетот. Тоа им овозможило да го отстранат тоалетот, да направат отвор во ѕидот и да се провлечат низ него. Потоа избегале од затворскиот комплекс, прескокнувајќи ограда.

По бегството, на ѕидот останал натписот „To Easy LoL“, кој дополнително го привлече вниманието на јавноста кон пропустите во обезбедувањето.

Видео на ABC непосредно по бегството:

Адвокатот на Вилијамс изјавил дека неговиот клиент немал намера да им помогне на затворениците да избегаат, но признал дека не ги почитувал пропишаните процедури. Според одбраната, пред да го исклучи доводот на вода требало да биде издаден соодветен работен налог.

Случајот доби и пошироки правни и политички димензии. Поранешната шерифка на округот Орлеанс, Сузан Хатсон, беше обвинета во април годинава по 30 точки од обвинението, меѓу кои злоупотреба на службената положба, попречување на правдата и фалсификување или одржување лажни службени записи.

Нејзината поранешна финансиска директорка Бијанка Браун се соочува со 20 точки од обвинението за дела поврзани со истиот случај.

Обвинителите тврдат дека пропустите во управувањето со затворот и непочитувањето на законските обврски придонеле за бегството. Хатсон не е обвинета дека директно им помогнала на затворениците да избегаат.

И Хатсон и Браун се изјасниле дека не се виновни.

Сите десет затвореници повторно се зад решетки

Бегството се случи во мај 2025 година, кога десет затвореници успеаја да излезат од затворот во Њу Орлеанс низ отвор зад тоалетот. Меѓу нив имало лица обвинети или осудени за тешки кривични дела, вклучително и убиства.

По бегството беше организирана потрага во која учествуваа локални, државни и федерални полициски служби. Сите десетмина на крајот беа фатени, но еден од нив успеа да избегнува апсење околу пет месеци.

Истрагата опфати и други лица за кои се сомнева дека им помогнале на бегалците. Случајот продолжува да се води одделно од постапката во која Вилијамс веќе ја призна вината и ја доби затворската казна.

Back to top button