АРТВЕСТИСЦЕНА

Втора вечер на 41. „Макфест“: Штип подготвен за музички спектакл и враќање на големите ѕвезди

Штип е подготвен за музички спектакл на втората вечер на 41. „Макфест“. На сцената се враќаат Врчак, Јован Јованов, Тони Зен, Елвир Мекиќ и други ѕвезди.

По успешната прва фестивалска вечер исполнета со нови композиции и одлични вокални изведби, 41. издание на фестивалот „Макфест“ продолжува вечерва во Штип, со програма која ветува вистински музички спектакл. Втората фестивалска вечер ќе помине во знакот на враќањето на големите и добро познати имиња на македонската естрада, од кои дел по подолг период повторно застануваат на сцената.

Врз основа на гласовите од публиката и стручното жири, од првата вечер шест композиции обезбедија пласман во финалето. Место во продолжението на фестивалската приказна изборија „Арте-Факт“, Тамара Грујеска, Елена Наумова, Теа Златева, Анастаcија Спасевска и Драгана Јовановска, кои вечерва уште еднаш ќе ги претстават своите песни. Уметничкиот директор на фестивалот, Роберт Саздов, истакна дека организаторите се подготвени за извонредно доживување, најавувајќи вкупно 18 композиции за вечерва – шесте финалисти и 12 нови песни.

Она што ѝ дава посебна тежина на вечерашната програма е присуството на афирмираните ѕвезди. На макфестовската сцена повторно ќе настапат Врчак и Симона Поповска, Јован Јованов и Тони Зен, Елвир Мекиќ, Ристо Самарџиев, Викторија Лоба, Агни Авшар, Наташа Малинкова, Марија Данева, Теа Трајковска, Марија Спасовска, Огнен Здравковски и Давид Темелков. Музичкиот директор Илија Ќосевски најави дека оваа комбинација на различни генерации и стилови ветува носталгија и квалитетни изведби, повикувајќи ја публиката да им даде поддршка и на дебитантите.

Посебен белег на синоќешното отворање остави ревијалниот настап на Антониа Гиговска, која во емотивна атмосфера изведе дел од најпопуларните некогашни хитови на „Макфест“, давајќи им нов живот на добро познатите рефрени.

Вечерашната програма започнува во 20:30 часот, а публиката ќе може да го следи фестивалот и преку директен телевизиски пренос на Македонската радио-телевизија (МРТ).

Back to top button