
Овој петок (13 ноември), со почеток во 18:30 часот, во просториите на „Europe House“ во Скопје ќе се одржи промоцијата на проектот „Збор по збор“, кој е посветен на промоција и зачувување на влашкиот јазик.
Проектот опфаќа осум илустрирани книги наменети за деца, придружени со соодветна аудио содржина. Организаторите од здружението „Тихе Тихеон“ – Скопје посочуваат дека целта е преку еден нов и креативен пристап да се поттикне учењето на јазикот уште од најрана возраст.
Настанот е од отворен карактер и организаторите ги покануваат сите заинтересирани граѓани да присуствуваат со своите најмлади членови од семејството. Како што е најавено, сите промовирани детски книги ќе бидат целосно бесплатни.
„Да го зачуваме нашиот јазик. Влашкиот јазик. Збор по збор“, порачуваат организаторите во својата јавна покана.
Инаку, оваа публикација и придружната онлајн содржина се реализирани со финансиска поддршка од Министерството за односи меѓу заедниците.
