Регулаторната комисија за енергетика (РКЕ) на денешната седница донесе одлука со која малопродажните цени на нафтените деривати се намалуваат во просек за 2,43 отсто.
Новите, пониски цени на горивата стапуваат на сила од 17 ноември 2026 година во 00:01 часот.
Согласно одлуката, ЕУРОСУПЕР БС-95 се намалува за 2,00 денари и ќе се продава за 84,00 денари за литар, додека новата цена на ЕУРОСУПЕР БС-98 исто така бележи пад од 2,00 денари и ќе изнесува 86,00 денари за литар.
Најголемо намалување од горивата за транспорт има кај ЕУРОДИЗЕЛ (Д-Е V) кој поевтинува за 2,50 денари, со што новата цена ќе биде 92,00 денари за литар.
Екстра лесното масло (ЕЛ-1) бележи намалување од 3,00 денари и ќе чини 100,50 денари за литар, а мазутот М-1 НС поевтинува за 0,998 денари и ќе се продава по 48,314 денари за килограм.
Од РКЕ посочуваат дека клучна причина за поевтинувањето е падот на референтните цени на нафтените деривати на светскиот пазар. Споредбено со претходната пресметка, бензините на светските берзи бележат намалување во просек за 7,484 отсто, додека кај дизелот намалувањето изнесува 4,032 отсто. Курсот на денарот во однос на доларот изнесувал 55,1260 денари, што е за 0,5039 отсто повисоко од претходната пресметка. При формирањето на цените е применет и намален износ на акцизата од 1,00 денар за литар кај бензините и 4,00 денари за литар кај дизелот, како и намален износ на ДДВ за дизелот од 10 отсто.





