ВЕСТИЕДНАКВИИМПУЛССВЕТ

Администрацијата на Трамп ги ослабува гаранциите за лицата со попреченост

Отстранувањето на одредби од федералните правила предизвика загриженост за заштитата од непотребна институционализација. Основните законски права остануваат во сила, но организациите предупредуваат дека нивното спроведување е доведено во прашање.

Речиси 50 години американската федерална влада го поддржуваше ставот дека лицата со попреченост треба да живеат, работат и учат во заедницата, наместо да бидат непотребно издвоени во институции. Но администрацијата на Доналд Трамп презеде конкретен чекор за повлекување од оваа политика, известува американското јавно радио NPR, во напис објавен и од KGOU.

Федералниот судија Џејмс Весли Хендрикс на 23 септември одобри отстранување на конкретни одредби за интеграција од правилата со кои американското Министерство за здравство и социјални услуги го спроведува членот 504 од Законот за рехабилитација. Овој закон забранува дискриминација врз основа на попреченост во програми што добиваат федерална финансиска поддршка.

Одлуката во предметот „Тексас против Кенеди“ ја отстранува, меѓу другото, дефиницијата за „најинтегрирана средина“ и одредбите што бараат да се даде предност на услугите и програмите во таква средина. Судот го прифати заедничкото барање на федералната администрација и пет сојузни држави: Тексас, Флорида, Алјаска, Луизијана и Монтана.

Министерството за правда, кое ја застапувало тужената федерална страна, се откажало од одбраната на спорните одредби и го поддржало нивното отстранување.

Правата остануваат, но нивното спроведување е под притисок

Брус Дарлинг, претседател и извршен директор на Центарот за права на лицата со попреченост, за NPR изјавил дека одлуката ја доживеал „како нож во градите“. Тој предупредува дека промената испраќа опасна порака за слободата и самостојноста на лицата со попреченост.

Дарлинг оценува дека правото на интеграција останува запишано во законот, но неговото практично спроведување сега е сериозно доведено во прашање.

Џенифер Матис, адвокатка од Центарот за право на менталното здравје „Базелон“, нагласува дека судската одлука не ги укинува заштитите што произлегуваат од Законот за Американците со попреченост и пресудата на Врховниот суд „Олмстед“. Сепак, предупредува дека губењето на јасните правила може да влијае врз постапувањето на сојузните држави и врз остварувањето на правата.

Промената следува по правното мислење на Министерството за правда од јуни, со кое се оспорува долгогодишното толкување на обврската за интеграција. Федералната администрација потоа побарала отстранување на одредбите од правилата што биле ажурирани во 2024 година.

Децата во Флорида како конкретен пример

NPR го посочува случајот со децата со сложени медицински потреби во Флорида. Федералната влада во 2023 година добила спор против државата, која била обврзана да обезбеди услуги што им овозможуваат на децата да останат со своите семејства, наместо да бидат сместувани во установи за долготрајна нега.

Но во август годинава, федералната влада побарала од судот да ја поништи претходната одлука во нејзина корист и предметот повторно да се разгледува, повикувајќи се на новиот правен став на Министерството за правда. Матис остро го критикувала потегот поради можните последици за децата и нивните семејства.

Реакција во Конгресот

Како одговор на промените, демократската конгресменка Деби Дингел и републиканскиот конгресмен Брајан Фицпатрик предложиле резолуција што го потврдува правото на лицата со попреченост да живеат и да добиваат услуги во своите заедници.

Според Disabled Journalists Association, кој извести за иницијативата на 30 септември, резолуцијата ја потврдува пресудата „Олмстед“ како одраз на намерата на Конгресот. Организациите за права на лицата со попреченост ја поздравиле иницијативата и повикале на поширока поддршка меѓу законодавците.

Паралелно, организациите се залагаат за предлог-закон што дополнително би го зацврстил правото на живот во заедницата. Делавер веќе усвоил закон со кој ги вградува отстранетите федерални регулаторни гаранции во законодавството на сојузната држава, известува NPR.

Редакција Брц

Back to top button