ВЕСТИПОЛИТИКА

ВМРО-ДПМНЕ бара истрага од Обвинителството: Државата платила 4,6 милиони евра провизии за железничкиот Коридор 8

Државниот завод за ревизија (ДЗР) утврдил дека првата и втората фаза од изградбата на железничкиот Коридор 8 не се завршени, а државата платила 4,6 милиони евра провизии за неповлечени средства, информираше денеска пратеникот на ВМРО-ДПМНЕ, Александар Велјановски, повикувајќи се на ревизорскиот извештај.

Според наводите изнесени на прес-конференцијата, ДЗР констатирал неефикасно управување со овие стратешки проекти од страна на претходната власт на СДСМ и ДУИ. Проектот доцнел со години, при што граѓаните плаќале милионски провизии без да добијат никаков конкретен инфраструктурен резултат. Велјановски посочи дека ревизорите предупредиле и на сериозен ризик од губење на 61 милион евра неповратни средства од ИПА грантовите наменети за третата фаза од железницата кон Бугарија.

Владејачката партија преку својот пратеник упати јавен повик до Јавното обвинителство веднаш да реагира и детално да го истражи извештајот на Државниот завод за ревизија. Од ВМРО-ДПМНЕ бараат обвинителите да утврдат како настанале трошоците од 4,6 милиони евра, да ги лоцираат одговорните лица за доцнењето на проектот и да истражат дали со нивното постапување или непостапување е предизвикана директна штета на државниот буџет.

Велјановски нагласи дека овие милионски провизии се само дел од последиците од начинот на владеење на СДСМ и ДУИ, кои граѓаните денес ги плаќаат, заклучувајќи дека разликата во управувањето со државните ресурси е евидентна.

Back to top button