
Општина Прилеп во партнерство со Владата и ресорните министерства реализира 18 капитални проекти поддржани со вкупна сума од околу 12 милиони евра, соопштија денеска од Центарот за комуникации на владејачката ВМРО-ДПМНЕ. Од партијата информираат дека од овие проекти, шест се веќе целосно завршени, пет се во завршна фаза, додека изведбата на седум е започната.
Еден од најголемите инфраструктурни зафати, како што се наведува во партиското соопштение, е изградбата на кружниот тек кај мостот „Табана“. Овој проект, според ВМРО-ДПМНЕ, е вреден над два милиони евра и опфаќа санација и проширување на мостот, нова траса, регулација на речното корито и нова сигнализација. Од партијата посочуваат дека за локалната патна инфраструктура се обезбедени 168 милиони денари за период од три години, наменети за реконструкција на улици и тротоари во повеќе населби. Во делот на водоснабдувањето, во соопштението се потенцира дека по повеќе од 70 години е обновена мрежата во Карабдалица, а се инвестираат и 25 милиони денари за нови мрежи во Селце и Лениште.
Во насока на заштита на животната средина, од партискиот Центар за комуникации истакнуваат дека е изградена нова фотонапонска централа за пречистителната станица. Тие додаваат дека градот добива полуподземни контејнери на 21 локација и ја има првата фабрика за селекција на отпад од ваков тип во државата. Дополнително, како што велат од партијата, Прилеп добива модернизирани општински услуги преку нов Центар со над 1.000 дигитални услуги, а во подготовка е и нов Генерален урбанистички план.
Локалната самоуправа бележи зголемување и на финансиската поддршка за културата и спортот, тврдат од ВМРО-ДПМНЕ. Според нивните податоци, средствата за културни манифестации се зголемени од четири на 12 милиони денари, додека за спортските клубови се издвоени 14,5 милиони денари. Во соопштението се заклучува дека општината континуирано се грижи за ранливите категории, обезбедувајќи по 3.000 денари за секое прваче, како и отворање на нови дневни центри за стари лица и за лица со попреченост.
