ВЕСТИПОЛИТИКА

ДУИ: Скандалозно и незаконско именување во МРТ, јавниот сервис се претвора во инструмент на пропаганда

Опозициската Демократска унија за интеграција (ДУИ) преку официјално соопштение упати најостри критики и обвинувања до владејачката коалиција ВМРО-ВЛЕН, тврдејќи дека се спроведува политичко заробување на Македонската радио-телевизија (МРТ). Според партијата, овој процес директно го уништува јавниот, професионалниот и мултиетничкиот карактер на националниот медиумски сервис, се наведува во партиското соопштение на ДУИ.

Како повод за ваквата реакција, од ДУИ го посочуваат вчерашното именување на нов заменик-генерален директор на јавниот сервис, за кое тврдат дека е целосно незаконско. Од партијата нагласуваат дека избраното лице не ги исполнува ниту основните законски услови и критериуми кои биле претходно утврдени во рамките на јавниот конкурс.

Од ДУИ потенцираат дека со овој избор на Програмскиот совет на МРТ грубо се прекршени сите професионални стандарди во јавната администрација и во медиумската сфера.

„За работно место како соработник или советник во јавната администрација потребни се високо образование и работно искуство по завршувањето на образованието. Но, за да се задоволат апетитите на ВЛЕН, Програмскиот совет именува лице на врвот на јавниот сервис кое не ги исполнува ниту условите за позиција соработник. Алармантно е што на чело на јавен медиум се именува лице без ниту еден ден работно искуство во новинарството. Ова претставува деградација на професионалните стандарди, потценување на стотиците новинари во МРТ и доказ дека единствен критериум е политичката лојалност кон ВМРО-ДПМНЕ и ВЛЕН“, реагираат од опозициската партија.

Поради сериозноста на случајот, ДУИ упати јавен повик до Јавното обвинителство и Државната комисија за спречување на корупцијата веднаш да отворат истражна постапка за да се утврди кривичната и административната одговорност на инволвираните лица. Истовремено, опозицијата ги повика Здружението на новинарите на Македонија (ЗНМ), Самостојниот синдикат на новинари (ССНМ), како и меѓународните организации ОБСЕ и Советот на Европа, итно да реагираат против, како што велат, опасниот процес на узурпација на МРТ кој претставува директен напад врз демократијата и мултиетничкиот карактер на државата.

Back to top button