
Познатиот холивудски актер Џон Гудман (74), најпознат по улогата во хит-серијата „Розан“, отворено проговори за својата долгогодишна борба со тежината и неверојатната трансформација во која ослабе повеќе од 90 килограми (200 фунти). Во најновото интервју за „The New Yorker“, Гудман открива дека патот кон здравјето започнал дури откако се соочил со своите деструктивни навики.
Иако успешно престанал да консумира алкохол во 2007 година, Гудман признава дека зависноста само ја префрлил на храната, достигнувајќи тежина од речиси 180 килограми (400 фунти).
„Бев на речиси 180 килограми. Јадев алкохоличарски откако престанав да пијам. Се прејадував, бидејќи тоа ми беше утеха. Се обидував да ја пополнам таа празнина. Истото важеше и за пиењето… само се обидував да го пополнам тој вакуум“, изјави Гудман за магазинот.
Добитникот на Златен глобус објаснува дека неговиот алкохолизам бил маѓепсан круг на барање инстант задоволство, што водело до мамурлаци и тресење на телото. Одлуката да го промени својот живот ја донел кога дошол во ситуација каде хоспитализацијата била неизбежна. „Едноставно се разболев и се уморив од тоа да бидам болен и уморен. Пиењето го одложуваше моето созревање и не сфаќав колку ме прави себичен. Го пропуштав вистинскиот живот“, искрен е актерот.
Пред да се отрезни, Гудман постојано варирал со тежината помеѓу снимањата на сезоните на „Розан“, губејќи и враќајќи по 30 до 40 килограми, што за него станало исцрпувачко. Клучот за неговиот сегашен успех, како што откри уште во интервју за „ABC“ во 2017 година, е трпението.
„Овој пат сакав да го направам тоа полека. Движење, вежбање. Доаѓам на возраст кога повеќе не можам да си дозволам да седам мирно“, истакна Гудман, докажувајќи дека упорноста и постепените животни промени даваат трајни резултати.
