ВЕСТИСПОРТ

Ждрепка за Лигата на шампионите: 36 екипи ќе ги дознаат осумте ривали

Денеска во Монако ќе биде одржана ждрепката за лигашката фаза на Лигата на шампионите за сезоната 2026/27, на која 36 клубови ќе ги дознаат своите осум противници во најсилното европско клупско натпреварување. Церемонијата во „Грималди форум“ почнува во 18 часот по средноевропско летно време, а директен и бесплатен пренос ќе има на UEFA.com и UEFA.tv, соопшти Европската фудбалска унија.

Ова ќе биде третата сезона на Лигата на шампионите со новиот формат во кој поранешната групна фаза е заменета со единствена лига од 36 екипи. Секој клуб ќе одигра осум натпревари против осум различни ривали, четири на домашен и четири на гостински терен.

Екипите се поделени во четири шешири со по девет клуба, според клупските коефициенти на UEFA. Секој тим ќе добие по два противника од секој шешир, вклучително и два ривали од сопствениот шешир. Со едниот ќе игра дома, со другиот на гости.

Во првиот шешир се Пари Сен Жермен, Баерн Минхен, Реал Мадрид, Ливерпул, Интер, Манчестер Сити, Арсенал, Барселона и Атлетико Мадрид.

Вториот шешир го сочинуваат Борусија Дортмунд, Рома, Спортинг Лисабон, Астон Вила, Порто, Манчестер Јунајтед, Клуб Бриж, Реал Бетис и ПСВ Ајндховен.

Во третиот се Феенорд, Лил, Бодо/Глимт, Наполи, Лајпциг, Виљареал, Фенербахче, Шахтар Доњецк и Галатасарај, додека во четвртиот шешир се Славија Прага, Слован Братислава, Штутгарт, АЕК Атина, ЛАСК, Комо, Ленс, Викинг и Сабах.

Последните седум учесници беа познати по завршувањето на плејофот во вторникот и средата. Место во лигашката фаза обезбедија Сабах, ЛАСК, Бодо/Глимт, АЕК Атина, Викинг, Слован Братислава и Фенербахче.

Ждрепката делумно рачна, делумно компјутерска

Поради сложениот формат, целата процедура не може практично да се изведе само со класично извлекување топчиња. Клубовите ќе бидат извлекувани рачно, а специјален софтвер ќе ги одредува нивните осум противници и ќе определува кои натпревари ќе се играат дома, а кои на гости.

Софтверот истовремено мора да ги почитува ограничувањата на UEFA. Во принцип, клубови од иста национална асоцијација не можат да играат меѓусебно во лигашката фаза, а една екипа може да добие најмногу два противника од иста друга земја.

Тоа значи, на пример, дека Реал Мадрид нема да може да биде извлечен против Барселона или Атлетико Мадрид во оваа фаза, но може да добие по два противника од Англија, Италија или друга асоцијација.

Осумте најдобри директно во осминафинале

По осумте кола сите 36 екипи ќе бидат рангирани на една заедничка табела. Првите осум директно се пласираат во осминафиналето, додека екипите од деветтото до 24. место ќе играат дополнителен плејоф за влез меѓу најдобрите 16. Клубовите од 25. до 36. позиција го завршуваат европското натпреварување и нема да продолжат во Лига Европа.

Првото коло од лигашката фаза ќе се игра од 8 до 10 септември, а последното осмо коло е закажано за 27 јануари 2027 година. UEFA ќе го објави комплетниот календар со точните датуми и термини на натпреварите најдоцна до сабота, 29 август.

Финалето на сезоната 2026/27 ќе се игра на 5 јуни 2027 година на стадионот „Метрополитано“ во Мадрид.

Back to top button