ВЕСТИПОЛИТИКА

СДСМ алармира: Дива депонија кај Рашче ја загрозува водата за пиење на Скопје

СДСМ предупредува на нова еколошка катастрофа која тлее во заштитеното подрачје кај изворот Рашче, од кој со вода се снабдува Скопје и околината. На денешната прес-конференција, генералниот секретар на партијата, Александар Саша Димитријевиќ, обвини дека создавањето на дива депонија во оваа зона претставува директна закана за водата за пиење и за здравјето на граѓаните.

Повикувајќи се на снимки од терен објавени во јавноста, Димитријевиќ посочи дека околината на изворот е затрупана со смет, што според него е алармантно бидејќи од таму вода пијат 25 отсто од граѓаните во државата, а во истата област се произведуваат и земјоделски култури кои завршуваат на пазарите. Од СДСМ директно ја прозваа власта и градоначалникот Орце Ѓорѓиевски, обвинувајќи ги за, како што велат, неспособност и неодговорност при заштитата на еколошките зони.

Потсетувајќи на ситуацијата во Гостивар, каде што повеќе од еден месец граѓаните немаат безбедна вода за пиење, како и на проблемите во над 50 други населени места низ државата, од опозициската партија прашуваат кој дозволил создавање на ваква депонија и кој ќе понесе одговорност за еколошкиот ризик.

„Кој го штити изворот Рашче? Кој ќе гарантира дека водата е безбедна? И кој ќе понесе одговорност? Граѓаните имаат право на чиста и безбедна вода. Не може цела Македонија да биде заложник на неспособноста и неодговорноста на ВМРО. Водата не е партиска тема, водата е живот“, истакна Димитријевиќ пред медиумите.

Back to top button