ВЕСТИМАКЕДОНИЈАПОЛИТИКА

Филков и Солдатов потпишаа договор: Дигитална трансформација и нов софтвер за бесплатната правна помош

Министерството за правда започнува со комплетна дигитална трансформација на системот за бесплатна правна помош во земјава. За таа цел, министерот за правда Игор Филков и раководителот на Програмската канцеларија на Советот на Европа во Скопје, Олег Солдатов, официјално потпишаа договор за поддршка на изработката на нов софтвер за бесплатна правна помош. Ова ново технолошко решение е дизајнирано да овозможи значително поефикасно, побрзо и поквалитетно управување со целиот процес на правна заштита.

Со воведувањето на овој дигитален систем, сите правни постапки ќе станат поедноставни и потранспарентни за јавноста. Како што соопштуваат од ресорното министерство, софтверот ќе овозможи напредно ефикасно управување со предметите, побрза обработка на поднесените барања од страна на граѓаните, како и многу подобра меѓуинституционална координација помеѓу сите инволвирани институции, адвокати и граѓански здруженија кои се јавуваат како даватели на бесплатна правна помош.

Полесен пристап до правда и подобра заштита на граѓанските права

Крајната цел на овој софтверски систем е директно да им помогне на социјално ранливите и сите други категории граѓани кои имаат потреба од правна заштита, а немаат доволно финансиски средства.

„За граѓаните, ова значи полесен пристап до услугите, поголема достапност на информациите и поедноставено остварување на правото на бесплатна правна помош. На овој начин се зајакнува пристапот до правда и се обезбедува подобра заштита на правата на сите граѓани“, се наведува во официјалното соопштение на Министерството за правда.

Оваа активност, која се реализира со директна менторска и финансиска поддршка од Советот на Европа, претставува значаен и голем исчекор кон градење на современ, ефикасен и целосно модернизиран правосуден систем во Република Северна Македонија кој е целосно прилагоден на потребите на граѓаните во дигиталната ера.

Back to top button