АВТОВЕСТИИМПУЛСТРЕНД

Hyundai најави над 100 модели до 2030 и Santa Fe EREV со 965 км досег

Hyundai Motor планира повеќе од 100 лансирања и обновувања на модели ширум светот до 2030 година, како дел од големата стратегија со која јужнокорејскиот производител сака значително да ја прошири понудата на електрични, хибридни и возила со продолжен електричен досег. Планот беше претставен на „CEO Investor Day 2026“ во Сеул, а меѓу најинтересните новитети е првиот Santa Fe EREV, кој треба да се појави во првата половина на 2027 година.

Компанијата планира 58 лансирања и освежувања во Северна Америка, 49 во Јужна Кореја, 41 во Европа, 26 во Индија и 22 во Кина. Овие бројки не значат повеќе од 100 целосно нови различни автомобили, туку вклучуваат нови генерации, редизајни, освежувања и деривати на постојните модели. Повеќе од 18 производи ќе претставуваат влез на Hyundai во сегменти во кои досега немал модел.

Меѓу првите новитети се новите Elantra, IONIQ 3, Tucson и Tucson Hybrid, како и Santa Fe EREV. Предвиден е и нов електричен SUV од А-сегментот за Индија, глобален SUV од Б-сегментот и посебен Б-сегмент SUV за европскиот пазар. Новата генерација на Tucson, еден од најпродаваните модели во историјата на Hyundai со повеќе од 10 милиони примероци, треба да почне да се појавува на првите пазари во четвртиот квартал.

Што е EREV и зошто Hyundai се обложува на оваа технологија?

Најголем технолошки новитет е влегувањето на Hyundai во сегментот на EREV – Extended Range Electric Vehicle, односно електрични возила со продолжен досег.

Кај ваков автомобил главното придвижување го обезбедуваат електромоторите, додека моторот со внатрешно согорување првенствено служи како генератор за производство на електрична енергија кога батеријата е испразнета. Така возачот добива чувство на возење слично на електричен автомобил, но со значително поголем вкупен досег и помала зависност од инфраструктурата за полнење.

Првиот Santa Fe EREV треба да пристигне во првата половина на 2027 година и Hyundai најавува вкупен досег од повеќе од 600 милји, односно околу 965 километри, со полна батерија и резервоар. Моделот ќе се произведува во фабриката на Hyundai во Алабама, САД.

И луксузниот бренд Genesis ќе добие EREV SUV. За него Hyundai поставува уште повисока цел – над 640 милји, односно повеќе од 1.000 километри вкупен досег, со почеток на продажбата во 2027 година.

Hyundai претходно објасни дека неговите EREV модели ќе користат батерии развиени во рамките на компанијата и дека треба да постигнат перформанси слични на целосно електричните автомобили со батерија со помал капацитет. Тоа потенцијално може да ја намали цената, тежината и зависноста од големи количества батериски материјали.

До 2030, шест од десет продадени Hyundai треба да бидат електрифицирани

Hyundai очекува електрифицираните модели – категорија што ги опфаќа електричните автомобили, хибридите и EREV возилата – до 2030 година да сочинуваат 60 проценти од глобалната продажба, наспроти 23 проценти во 2025 година. Целта на компанијата е до крајот на деценијата да продава 5,55 милиони возила годишно и да достигне околу шест проценти од светскиот автомобилски пазар.

Компанијата планира и огромно проширување на производството. Глобалниот капацитет треба да се зголеми за 1,27 милиони автомобили годишно, од кои дополнителни 500.000 во Северна Америка, 320.000 во Индија и 200.000 во Јужна Кореја.

Стратегијата оди и подалеку од автомобилите. Hyundai најавува забрзана комерцијализација на роботите на Boston Dynamics, проширување на роботакси-програмата со Waymo и развој на нови софтверски дефинирани возила. Првиот сериски модел со систем за автономно возење од ниво 2+ е планиран за 2028 година.

Со новата стратегија Hyundai практично не се обложува само на еден тип погон. Наместо нагло преминување исклучиво на батериски електрични автомобили, компанијата ќе комбинира EV, хибридни и EREV модели, обидувајќи се да одговори на различната брзина на електрификација во Европа, САД, Кина и останатите пазари.

Д. Д.

Back to top button