
Англискиот шампион Ливерпул постигнал договор со Барселона за ангажман на уругвајскиот дефанзивец Роналд Араухо на едногодишна позајмица, објавија повеќе британски медиуми. Според информациите, договорот вклучува и опција за откуп по завршувањето на сезоната.
Трансферот доаѓа како изненадување, со оглед на тоа што 27-годишниот стопер важеше за еден од лидерите на каталонскиот клуб и имаше важечки договор со Барселона до 2031 година. Сепак, Ливерпул решил да реагира на проблемите во одбраната и да обезбеди дополнителна конкуренција во пресрет на новата сезона.
Според „Скај Спортс“, раководството на клубот од „Енфилд“ барало засилување во централниот дел од одбраната по заминувањето на Ибрахима Конате и поради ограничените опции на располагање на тренерот Андони Ираола.
Араухо е дел од првиот тим на Барселона од 2019 година и зад себе има повеќе од 200 настапи за шпанскиот гигант, како и значајно искуство во Лигата на шампионите и со репрезентацијата на Уругвај.
Според најавите, уругвајскиот репрезентативец во наредните денови треба да ги мине медицинските прегледи и да му се приклучи на тимот на Ливерпул, кој се подготвува за стартот на новата сезона во Премиер лигата.
