
Дебатата за потеклото на личниот имот и стилот на живот на политичките лидери е во фокусот на најновите соопштенија објавени денеска од СДСМ и ВМРО-ДПМНЕ. Додека опозицијата го проблематизира начинот на кој премиерот Христијан Мицкоски набавил скап часовник, владејачката партија возвраќа со прашања за имотот на поранешниот и актуелниот лидер на социјалдемократите во земјата и во странство.
СДСМ прашува како Мицкоски го заработил скапиот часовник исклучиво со професорска плата, потсетувајќи дека во изборната кампања тој тврдел оти живее тешко како и сите останати граѓани. Од партијата поставуваат дилема дали тоа било во времето кога тој ја раководел државната компанија ЕЛЕМ. Социјалдемократите го анализираат неговиот однос кон луксузот преку психолошки осврт, цитирајќи ги Зигмунд Фројд и Ерих Фром, и посочуваат дека изјавата на Мицкоски оти скапите часовници му се „слабост“ всушност претставува признание за зависност од пари, контрола и поседување како надомест за чувство на несигурност.
На овие наводи одговорија од Центарот за комуникации на ВМРО-ДПМНЕ, од каде наведуваат дека премиерот стотици пати транспарентно говорел за начинот на кој заработувал во својот живот како признат универзитетски професор, без местење тендери или користење фирми во странство. Владејачката партија посочува дека опозицијата не може да сфати оти во државата може да се заработи на чесен начин, насочувајќи го вниманието кон имотот на Зоран Заев и Венко Филипче.
Од ВМРО-ДПМНЕ отвораат прашање како тие стигнале до станови, зграда и златна виза во Дубаи, милионска јахта на Егејот, акции во индиска авиокомпанија и фирми во соседна Бугарија. Според владејачката партија, ваквиот имот е резултат на местење тендери, земање провизии и задолжување на државата, а криминалот е заштитен преку нивни инфилтрирани поединци во правосудството. Тие додаваат дека на опозицијата ѝ пречи што забавата на Дејвид Гета чинела нула денари, но не им пречела приватна забава во Дубаи на Харис Џиновиќ која чинела стотици илјади долари.
