ВЕСТИПОЛИТИКА

СДСМ: Мицкоски и ВМРО-ДПМНЕ подлабоко тонат во кризата со неисправната вода за пиење

Додека во шест населени места водата е неисправна за пиење, а низ реките Лепенец и Вардар тече бела пена, владејачката ВМРО-ДПМНЕ продолжува со истата тактика на неприфаќање никаква одговорност и упорно ја обвинува опозицијата, соопштија денеска од Центарот за комуникации со јавноста на СДСМ.

Од опозициската партија реагираат на обвинувањата од власта дека СДСМ прави „хистерија“ за да дефокусира, прашувајќи од што поточно би дефокусирале и посочувајќи ги реалните проблеми со кои се соочуваат граѓаните.

„Хистерија е да ја обвинуваш опозицијата додека граѓаните немаат питка вода“

Од СДСМ истакнуваат дека зачестените деманти и префрлањето на вината нема да ги решат сериозните еколошки и здравствени предизвици.

„Хистерија е да ја обвинуваш опозицијата додека граѓаните не смеат да ја пијат водата од чешма. Хистерија е кога министер за здравство, наместо да преземе одговорност, ги обвинува и навредува професорите и лекарите затоа што ја кажуваат вистината. Хистерија е да тврдиш дека проблемот е од ‘претходниот систем’, додека си на власт веќе две години, а водата се загадува токму сега. Власта не сака да прифати одговорност и упорно ја префрла вината на други, но кризата со неисправната вода веќе не може да се сокрие зад партиски обвинувања“, соопштуваат од Центарот за комуникации со јавноста на СДСМ.

Од опозициската партија подвлекуваат дека колку повеќе Владата се брани со ваква реторика, толку подлабоко тоне во кризата, додека граѓаните остануваат директно засегнати од лишувањето од основно право на безбедна и чиста вода за пиење.

Back to top button