АРТВЕСТИ

Македонската книжевност со национален штанд на Саемот на книгата во Франкфурт

Македонската книжевност и годинава ќе биде дел од престижниот светски Саем на книгата во Франкфурт, кој ќе се одржи од 7 до 11 октомври. Како што информираат од Министерството за култура и туризам, државата ќе биде застапена преку Македонската асоцијација на издавачи (МАИ) која ќе настапи со сопствен национален штанд.

Во фокусот на овогодишното претставување ќе бидат современата македонска книжевност и литературата за деца. Целта на учеството, посочуваат од Министерството, е промоција на домашните писатели и отворање нови можности за превод и објавување на македонски автори во странство.

За таа цел, МАИ ќе го продолжи концептот насловен „Читај во 7/8“, преку кој македонската книжевност се презентира пред меѓународната публика како литература со сопствен, препознатлив ритам и автентичен глас.

Покрај литературните дела, на франкфуртскиот саем ќе бидат промовирани и можностите за финансиска поддршка наменети за странските издавачи. Тие ќе бидат информирани за актуелниот конкурс на Министерството за култура и туризам преку кој можат да добијат средства за превод на дела од македонски автори.

Националното претставување на македонската книжевност во Франкфурт се реализира со финансиска поддршка од ресорното министерство.

Back to top button