ВЕСТИСВЕТ

Најмалку 14 новороденчиња загинаа во пожар во породилиште во Пакистан

Најмалку 14 новороденчиња го загубија животот во средата наутро во еден од најсмртоносните болнички пожари во последните децении во Пакистан, пренесува Си-Ен-Ен (CNN).

Пожарот избувнал околу 7 часот наутро по локално време во породилиштето на државниот Пакистански институт за медицински науки (PIMS), кој важи за најголема болница во главниот град Исламабад.

Според извори од спасувачките служби, огнената стихија најверојатно била предизвикана од експлозија на компресор за клима уред сместен во самата детска соба каде што биле згрижени бебињата. Болничките работници успеале да спасат само едно дете од пламените јазици, а повеќе лица пријавиле дека за време на паниката наишле на заклучени врати во одделот.

„Никој не може да ја разбере болката“

Сцените пред болницата беа потресни. Еден татко, скршен од болка, пред новинарите изјави дека неговото тридневно бебе загинало во пожарот.

„Никој не може да ја разбере болката низ која поминувам“, изјави тој.

Муниба, жена која во тој момент била во посета на семејството во болницата, раскажа како за влакно успеала да побегне со својот внук и снаата додека пожарот брзо се ширел. „Му благодарам на Бога што нашето бебе е безбедно“, изјави таа за Си-Ен-Ен.

Барања за одговорност и итна истрага

Пакистанскиот премиер Шехбаз Шариф истакна дека е „длабоко натажен од овој трагичен инцидент“ и нареди итна истрага, ветувајќи „строги мерки против сите за кои ќе се утврди дека се одговорни“.

Пратеничката во националното собрание, Шармила Сахиба Фаруки, го нарече инцидентот „срамен и непростлив“. Таа преку социјалните мрежи порача: „Мора да има одговорност. Ве молам, немојте да се криете зад уште една анкетна комисија. Одговорните мора да бидат изведени пред лицето на правдата.“

Државните болници во Пакистан со години се цел на критики поради хроничното недоволно финансирање, недостатокот на персонал, застарената инфраструктура и слабата подготвеност за итни случаи. Иако Исламабад е дом на политичката и воената елита и медицинските установи таму вообичаено се на повисоко ниво отколку во остатокот од земјата, оваа трагедија ги исфрли на површина системските пропусти.

Пакистан во изминатите години се соочи со неколку големи пожари во објекти со застарени електрични системи, вклучително и пожарот во детската болница во Лахор во 2022 година, како и неодамнешниот пожар во трговски центар во Карачи во кој загинаа 67 лица.

Back to top button