ВЕСТИХРОНИКА

ПАТРОЛА: Полицаец немал возачка дозвола и возел нерегистриран автомобил, жена пронајде димна бомба во својот дом

Димна бомба пронајдена во плакар во стан во скопски Аеродром, полицаец кој возел автомобил без возачка дозвола, како и тешка сообраќајна несреќа во која настрадаа двајца малолетници, се главните настани кои ја одбележаа црната хроника. Ова се дел од најсериозните инциденти нотирани во најновиот извештај на Министерството за внатрешни работи.

Скопјанка на возраст од 57 години пријавила шокантно откритие откако во плакар во нејзиниот стан во општина Аеродром пронашла димна бомба. Полициски екипи веднаш излегле на терен и го подигнале предметот, а се работи на целосно расчистување на овој несекојдневен и потенцијално опасен случај.

Во меѓувреме, Одделот за внатрешна контрола поднесе кривична пријава против полициски службеник од станицата во Драчево поради безобѕирно управување со возило. Според пријавеното, полицаецот надвор од работното време возел автомобил со измината регистрација и без воопшто да има положено возачки испит. Против него е поднесен и предлог за утврдување дисциплинска одговорност и кршење на работниот ред.

Состојбата на патиштата и натаму носи трагични последици, особено за најмладите. Во струмичкото село Муртино се случила тешка сообраќајна несреќа помеѓу трактор и мотоцикл управуван од 14-годишник. Во сударот со тешки телесни повреди се здобиле малолетниот возач и неговиот врсник кој се возел како сопатник, по што веднаш биле пренесени во Медицинскиот центар во Струмица.

Во делот на финансискиот криминал, струмичката полиција откри голема даночна измама. Управител на фирма од селото Бориево го оштетил државниот буџет откако во фирмата бил констатиран кусок од над 3,1 милиони денари кои биле извлечени како материјални трошоци, а никогаш не биле оправдани на трансакциската сметка.

Полицискиот билтен бележи и голем пожар во скопско Зелениково, каде во пламени јазици целосно изгорела штала во која се чувале над 400 бали детелина и жито, но за среќа инцидентот поминал без повредени лица.

Back to top button