Јаневска најави оптимизација на училиштата – Македонија со помалку часови од европскиот просек

Во изминатите седум години од владеењето на претходната коалиција на СДСМ и ДУИ, бројот на ученици во Македонија се намалил за застрашувачки 17 илјади, алармираше министерката за образование и наука, Весна Јаневска. Поради ваквиот сериозен пад, Министерството за образование и наука (МОН) започнува итен процес за оптимизација на училишната мрежа во државата, со цел да се спаси и да се унапреди воспитно-образовниот процес за најмладите.
Министерката посочи дека во моментов постојат многу подрачни училишта во земјава со по две-три деца кои се соочуваат со огромни хендикепи во развојот. Тие деца ниту се социјализираат правилно, ниту имаат реална можност да се натпреваруваат со своите врсници, а дополнително не можат да применуваат ниту современа технологија бидејќи истата воопшто ја нема во нивните мали училишта.
„Тие деца треба да се приклучат кон најблиските поголеми училишта и да имаат поквалитетен воспитно-образовен процес. Тоа е од нивен интерес, а нивните интереси се приоритетни во политиките на МОН. Притоа, потенцирам, ниеден наставник нема да ја изгуби работата“, децидна е Јаневска.
Јаневска гарантира: Во изминатите две години нема отпуштања, наставничкиот кадар е безбеден
Министерката Јаневска упати силна и смирувачка порака до просветните работници во Македонија, нагласувајќи дека во изминатите две години од мандатот на актуелната Влада, ниту еден единствен наставник не е отпуштен од работа, а таква пракса нема да има ниту во периодот што следи.
Наместо кратење на работни места, министерството подготвува модел со кој на сите наставници ќе им се даде реална можност да го надополнат потребниот фонд на часови кој евентуално им недостасува. Тоа ќе се реализира преку:
Дополнителна работа со талентирани ученици;
Посебна поддршка за учениците кои заостануваат во совладувањето на наставните програми;
Организирање дополнителни наставни и воннаставни активности;
Водење на најразлични училишни секции и слични проекти.
Главната цел на овие реформи, според министерката, е и потребата децата во Македонија да поминуваат подолго време во училишните клупи. Официјалните анализи покажуваат поразителен факт – нашите ученици имаат драстично помалку часови во споредба со европскиот просек.
Статистиката покажува дека учениците во Македонија до својата 14-годишна возраст поминуваат вкупно 6.816 часа на училиште. За споредба, просекот во земјите кои се членки на ОЕЦД изнесува 7.775 часа, што значи дека на македонскиот образовен систем му недостасуваат речиси 1.000 часа настава за да биде во чекор со развиениот свет.
Јаневска порача дека МОН интензивно се бори да го достигне овој европски стандард и конечно да се подигне квалитетот на знаењето, со цел македонските ученици во иднина да престанат да бидат на последното место при глобалните ПИСА тестирања.
