ВЕСТИМАКЕДОНИЈАСКОПЈЕ

Продолжува бесплатното одлагање кабаст отпад во Центарот за селекција во Карпош

Јавното претпријатие „Комунална хигиена“-Скопје ги информира жителите на главниот град дека претпријатието продолжува да им ја нуди можноста за бесплатно одлагање на кабастиот отпад. Сите заинтересирани граѓани можат без плаќање паричен надоместок да го одложат својот стар мебел, како и електронските и електричните апарати во Центарот за селекција на отпадот кој се наоѓа во општина Карпош, соопштија од ЈП „Комунална хигиена“-Скопје.

Центарот за селекција на отпадот е отворен за граѓаните секој ден во неделата, во терминот од 07:00 до 19:00 часот. На овој начин, претпријатието им овозможува на жителите на Скопје на легален и безбеден начин да се ослободат од цврстиот отпад кој честопати завршува на јавните површини.

Организиран превоз од домовите на граѓаните и законски санкции

За оние граѓани кои не се во можност сами да го транспортираат отпадот, ЈП „Комунална хигиена“-Скопје нуди и специјализирана услуга за преземање директно од нивните домови.

„Доколку граѓаните имаат потреба ЈП Комунална хигиена-Скопје со специјални комунални возила да го преземе и транспортира кабастиот отпад од нивните домови, оваа услуга можат да ја закажат од понеделник до петок, во периодот од 07 до 15 часот, на следните телефонски броеви: 0800 222 33 и 3216644“, се појаснува во официјалното соопштение.

Од јавното претпријатие упатуваат апел и потсетување до јавноста дека секое одлагање отпад на јавни и сообраќајни површини претставува директно прекршување на Законот за јавна чистота. Ваквото несовесно однесување подлежи на строги законски санкции и парични казни, а истовремено може да предизвика исклучително штетни последици за животната средина, околината и јавното здравје на сите граѓани.

Back to top button