ВЕСТИСПОРТ

Димевски со одговор до КФМ: Ова е најнеспособното раководство во историјата, го напаѓаат мојот син за да ги скријат своите неуспеси

Поранешниот претседател на Кошаркарската федерација, Даниел Димевски, обвини дека актуелниот функционер со иницијали Т.Г. шири клевети бидејќи се плаши од санкции за злоупотреба на службената положба. Тој тврди дека сегашната управа е безидејна и ги третира клубовите како банкомати.

Поранешниот претседател на Кошаркарската федерација на Македонија (КФМ) во периодот од 2005 до 2015 година, Даниел Димевски, упати остар јавен одговор откако Управниот одбор на КФМ на 11 ноември побара негова итна и неотповиклива оставка од функцијата претседател на Македонскиот олимписки комитет (МОК). Барањето на федерацијата беше базирано на обвинувања за конфликт на интереси и непотизам, посочувајќи дека Димевски ја злоупотребил позицијата во МОК за да го форсира сопствениот син во селекциите за 3х3 кошарка. Во своето повратно обраќање, Димевски директно прозва висок раководен функционер во федерацијата со иницијали Т.Г. (Тодор Гечевски), обвинувајќи го за клеветничко однесување и прикривање на катастрофалната состојба во македонската кошарка преку лични пресметки.

Димевски посочува дека функционерот Т.Г. во моментов се соочува со процес кој е во завршна фаза, а има за цел утврдување на негова лична одговорност за злоупотреба на службената положба и противправни дејствија со кои нанел штета на олимпиското движење. Според него, актуелизирањето на темата за 3х3 кошарката повеќе од една година по почетокот на проектот е директна последица на стравот кај Т.Г. „Единствениот логичен заклучок е дека токму стравот од соочување со претстојните санкции го поттикнал овој потег, проследен со ваквото клеветничко однесување“, дециден е Димевски. Тој појасни дека МОК се вклучил во поддршката на 3х3 кошарката исклучиво на барање на КФМ, бидејќи федерацијата немала ниту капацитет, ниту финансии, ниту интерес за овој сегмент.

Посебен револт кај Димевски предизвикало токму обвинувањето за непотизам и инволвирањето на неговото семејство. „Човечката мизерија оди до таму што не се бираат средства и се злоупотребува името на еден млад човек спортист, чиј единствен грев е што е мој син“, наведува Димевски, потсетувајќи дека неговиот син бил дел од младинската репрезентација која обезбеди опстанок во А дивизијата и капитен на средношколската репрезентација која освои златен медал на Европското првенство.

Тој не штедеше зборови за актуелната управа на КФМ, нарекувајќи ја „општа констатација дека ова е најнеспособното раководство што некогаш го имала КФМ“. Димевски ги обвини дека се безидејни, неспособни да обезбедат елементарни работи како топки и котизации, ниту да се изборат за подобар третман кај надлежното министерство. „Успешно спроведува мерки со кои ги исцицува и така истоштените клубови кои имаат третман како банкомат на федерацијата, а би требало да е сосема обратно“, заклучи Димевски, порачувајќи дека и покрај сè, тој останува посветен на помагањето на кошарката.

Back to top button