ВЕСТИПОЛИТИКА

СДСМ: Братот на Трајко Славески незаконски унапреден во М-НАВ, платата му се дуплирала

Портпаролката и членка на Извршниот одбор на СДСМ, Богданка Кузеска, на прес-конференција изнесе сериозни обвинувања за непотизам и партизација на институциите против владејачката ВМРО-ДПМНЕ. Како шокантен пример за ваквите злоупотреби таа го посочи скандалот со Сашо Славески, брат на високиот партиски функционер Трајко Славески, кој според партиските наводи бил незаконски унапреден во Македонска навигација (М-НАВ), се наведува во партиското соопштение од прес-конференцијата на СДСМ.

Според информациите презентирани од опозицијата, унапредувањето се случило во март 2025 година, а случајот стана познат во јавноста откако неодамна беше поднесена кривична пријава против членовите на Управниот одбор кои ја спровеле оваа одлука. Кузеска појасни дека Славески бил прераспределен од позицијата обезбедувач на имот (чувар) на високостручна позиција во Секторот за воздухопловна навигација, поточно како помошник за обука и координација во Одделението за воздухопловни информации (AIS).

Двојно поголема плата и финансиска штета за претпријатието

Од СДСМ потенцираат дека со оваа систематизација директно биле прекршени професионалните критериуми и закони на штета на буџетот на претпријатието.

„Со тоа платата двојно му се зголемила, од 50.000 на околу 100.000 денари. Значи, за само 14 месеци незаконски му биле исплатени повеќе од 7.000 евра на штета на М-НАВ. Нема систем, нема критериуми за тоа како е избран – квалификации, искуство, ништо. Единствениот критериум е тоа што е брат на Трајко Славески и близок до ВМРО. Така М-НАВ, наместо за безбедност на македонското небо, е претворено во партиски комитет. Ова е класичен симбол на непотизам, партизирани вработувања и злоупотреби на институциите“, изјави портпаролката на СДСМ, Богданка Кузеска.

Кузеска во своето обраќање додаде дека ваквиот селективен третман и партиската погодност пред знаењето и квалификациите се главната причина за масовното иселување на младите од државата. Опозицијата заклучи дека владејачкото мнозинство свесно ги кочи европските интеграции на земјата токму поради тоа што членството во Европската Унија подразбира воспоставување на владеење на правото, професионализација на јавниот сектор и доследна примена на мерит-системот при вработувањата.

Back to top button