ВЕСТИЕУПОЛИТИКА
Во тренд

Фон дер Лајен од Скопје: Ве чекаме во ЕУ со македонскиот идентитет и јазик, следната недела нов обид за деблокада

Европската Унија е подготвена да ја пречека Северна Македонија со нејзиниот македонски идентитет и јазик. Ова е главната порака која претседателката на Европската комисија, Урсула фон дер Лајен, ја упати од денешната заедничка прес-конференција со премиерот Христијан Мицкоски во Скопје. Нагласувајќи дека земјата припаѓа на иста маса со европското семејство, таа најави дека веќе следната недела ќе се направат конкретни чекори за надминување на застојот и деблокирање на евроинтегративниот процес.

Гаранција за јазикот и идентитетот

Оценувајќи ја Северна Македонија како ценет сојузник во НАТО и држава која носи храбри одлуки за својата иднина, Фон дер Лајен потенцираше дека е преостанат само уште еден клучен чекор за отворање на првиот кластер „Основи“. Свесна за тежината на прашањето, таа испрати недвосмислена порака до македонските граѓани.

„Знам колку е ова чувствително, но сакам да бидам и јасна околу она за што се залага Европа: ние ќе ѝ посакаме добредојде на Северна Македонија со нејзиниот идентитет и со нејзиниот јазик. Веруваме дека македонската култура и македонскиот јазик можат да ја направат нашата Унија побогата. Затоа што нашето мото е ‘различност и обединетост’, и ние сме мошне сериозни по тоа прашање“, порача претседателката на ЕК.

План за брза деблокада веќе следната недела

Одговарајќи на новинарско прашање, Фон дер Лајен потврди дека Брисел и Скопје се договориле за нов пристап кој треба да го придвижи процесот од мртва точка.

„Се договоривме да имаме еден прв нов чекор следната недела, и да се обидеме да го деблокираме процесот. Она што ќе се случува следната недела е ревидирањето на целиот тој процес за пристапување. Во моментот кога ќе ја деблокираме ситуацијата тука, моето лично мислење е дека можеме да бидеме мошне брзи со Северна Македонија. Имате направено импресивни работи на полето на реформите“, откри Фон дер Лајен, додавајќи дека по деблокадата, за земјата веднаш ќе бидат подготвени патокази.

Економски придобивки: Планот за раст носи видливи резултати

Покрај политичките пораки, фокусот на средбата беше ставен и на економската интеграција пред формалното членство. Претседателката на ЕК информираше дека Северна Македонија веќе добила 140 милиони евра преку Планот за раст, а дополнителни исплати следуваат во наредните недели.

Таа наброја и конкретни придобивки за граѓаните и бизнисите, како што се приклучувањето кон СЕПА (Единствената област за плаќања во евра) што драстично ги намалува провизиите за трансакции, тековните преговори за укинување на надоместоците за роаминг, како и вклучувањето на земјата во новиот Центар за вештачка интелигенција на ЕУ, кој ќе им овозможи на домашните компании пристап до европскиот суперкомпјутер.

И Европската Унија се менува за да прими нови членки

Проширувањето е двонасочен процес, посочи Фон дер Лајен, нагласувајќи дека не само што кандидатите мора да се реформираат, туку и самата Унија се подготвува за проширување.

„Ја претставуваме нашата политика за претпристапување преку која ги гледаме нашите институции, политики и буџет – што треба да се подобри и промени за да бидеме подготвени да ги пречекаме новите земји-членки. Ова е нов момент во регионот, а Европа ќе остане покрај вас бидејќи сме решени да ги внесеме луѓето на Северна Македонија во ЕУ“, заклучи Фон дер Лајен на прес-конференцијата во Скопје.

Ј. Ѓ.

Back to top button