Манасков: Над 250 деца со попреченост останаа без образовни асистенти, Јаневска и Мицкоски создадоа хаос во образованието

Јованче Манасков од Комисијата за образование на СДСМ, денеска обвини дека над 250 деца со попреченост, од кои најголем дел се првачиња, ја започнале учебната година без неопходната поддршка од образовни асистенти. Од партијата ја повикаа министерката за образование Весна Јаневска да одговори зошто се доцни со постапката иако училиштата ги доставиле барањата уште до 30 јуни по завршувањето на уписите.
Според тврдењата изнесени на прес-конференцијата, доколку постапката за вработување трае повеќе од дваесет дена, јасно е дека дел од овие ученици реално ќе ја добијат потребната асистенција дури по 20 септември. Од СДСМ реагираат дека за овие деца и нивните родители првиот училишен ден бил проследен со страв и неизвесност наместо со радост, додавајќи дека инклузијата не смее да биде само збор на хартија, туку реалност во секоја училница. Од партијата категорично бараат итно решавање на проблемот за ниту едно дете да не биде оставено без соодветна грижа.
Покрај недостигот на асистенти, од СДСМ изнесоа и податоци за, како што велат, општиот хаос во образовниот систем создаден од премиерот Христијан Мицкоски и министерката Јаневска. Според нивните партиски бројки, годинава во државата има над 3.000 првачиња помалку, затворени се 26 училишта, а бројот на паралелки е намален за 433, што според опозицијата е доказ за неспособноста на актуелната власт да се грижи за иднината на државата и образованието.
