ВЕСТИИМПУЛСРЕПУБЛИКАХРОНИКА

ПАТРОЛА: Малолетник извршил обљуба врз 15-годишно девојче и барал експлицитни снимки; тетовец фрлал дрога низ прозорец додека го бркала полиција

Тешко кривично дело во кое малолетник уценувал девојче со експлицитни снимки, приведување на преостанатите полски државјани кои упаднаа во воен магацин и спасување на дете од пожар во Скопје, се главните акценти во најновиот пресек на полицискиот билтен.

Скопската полиција расчистува сериозен и вознемирувачки случај на малолетничко насилство. Седумнаесетгодишник е лишен од слобода откако 40-годишна жена пријавила дека тој извршил обљуба врз нејзината 15-годишна ќерка. Според пријавеното во МВР, малолетникот не застанал тука, туку продолжил да го демне девојчето, инсистирајќи и уценувајќи ја да му испраќа експлицитни фотографии и видеоснимки.

Во меѓувреме, на Попова Шапка паднаа во рацете на полицијата и преостанатите тројца полски државјани кои беа во бегство откако претходниот ден со четирицикли ја пробија вратата на воените магацини во тетовско Еребино. Со нивното приведување комплетирана е групата странски државјани кои ќе одговараат за неовластено влегување во воени објекти.

Деноноќието поминало алармантно и за противпожарните служби. Единаесетгодишно девојче заврши на скопските клиники поради вдишување чад, откако избувнал пожар во стан на улицата „Воденска“. Огнот бил брзо изгаснат, а на детето му е укажана лекарска помош. Истовремено, во скопско Арачиново интервенирале противпожарни екипи откако засега непознати сторители запалиле багер марка „Волво“.

Полицискиот извештај бележи и неколку невообичаени случаи поврзани со наркотици. Дваесетгодишник од Тетово се обидел филмски да се ослободи од доказите, фрлајќи ја марихуаната низ прозорецот на својот автомобил додека полициската патрола го запирала. Во Кичево, пак, 49-годишен маж заработи кривична пријава откако свесно го отстапил својот „мерцедес“ на сограѓанин, за тој внатре непречено да конзумира марихуана.

Back to top button