АРТВЕСТИМАКЕДОНИЈА

Игор Џамбазов ја доби наградата „Васил Иљоски“: Паричниот дел ќе го донира за лекување на болно девојче

Познатиот македонски актер Игор Џамбазов е овогодишен добитник на престижната награда „Васил Иљоски“, која се доделува за високи достигнувања во театарската уметност од областа на комедијата. Ова значајно признание му беше врачено синоќа, на свеченото отворање на 29-тото издание на Меѓународниот театарски фестивал „Денови на комедијата“ во Куманово.

Примајќи ја наградата, Џамбазов истакна дека му претставува особена чест што признанието го носи името на истакнатиот драмски писател Васил Иљоски, кој бил близок пријател со неговиот дедо, бардот на македонското глумиште, Петре Прличко. Актерот со носталгија се потсети и на своите почетоци на сцената, кои биле токму преку делата на Иљоски.

Во хуман гест кој предизвика воодушевување кај присутните, Џамбазов најави дека паричниот дел од наградата целосно ќе го донира за лекување на едно девојче од Куманово кое боледува од церебрална парализа.

Фестивалот „Денови на комедијата“, кој ќе трае до 5 октомври, беше отворен со премиерната изведба на претставата „Смрт на погребот“. Во рамките на натпреварувачката програма, кумановската публика ќе има можност да проследи десет театарски претстави од Македонија, Србија, Босна и Херцеговина и Бугарија.

Back to top button