ВЕСТИПОЛИТИКА

Мисајловски на затворањето на SEEBRIG во Куманово: Земјава докажа дека е кредибилен и сигурен партнер за регионалниот мир

Со свечена церемонија денеска, 15 јули, во касарната „Боро Менков“ во Куманово, официјално заврши шестгодишниот престој на Командата на Бригадата на Југоисточна Европа (SEEBRIG) во нашата држава. Како што информираат од **Министерството за одбрана**, по завршувањето на овој успешен мандат, Командата врз принципот на ротација својата мисија ќе ја продолжи во Истанбул, Република Турција.

На завршната церемонија се обрати министерот за одбрана Владо Мисајловски, кој пред присутните истакна дека во текот на овој шестгодишен мандат, државата покажала оти успешно придонесува за регионалниот и меѓународниот мир и безбедност, докажувајќи се како сигурен, кредибилен и активен партнер. Според соопштението на Министерството, присуството на Командата во Куманово дополнително ги зацврстило односите и довербата меѓу земјите учеснички.

Регионалната соработка како темел на безбедноста

Министерот Мисајловски во својот говор ја потенцираше важноста на оваа безбедносна иницијатива за целиот регион:

„Шест години достигнувања, зајакната доверба и трајни пријателства. Тоа е SEEBRIG! Еден од најуспешните примери за регионална одбранбена соработка, изградена врз вредностите кои сите ние ги споделуваме – меѓусебна доверба, партнерство, солидарност и заедничка одговорност за мирот, стабилноста и безбедноста на Југоисточна Европа“, изјави министерот Мисајловски, додавајќи дека оваа иницијатива ја прикажува цврстата определба за колективна безбедност.

Од Министерството за одбрана додаваат дека министерот упатил и посебна благодарност до локалната самоуправа и граѓаните на Куманово за покажаното гостопримство, како и до сите војници и команданти кои служеа во оваа база. По повод затворањето на овој циклус, командантот на SEEBRIG, бригадниот генерал Билбил Битри, на министерот Мисајловски свечено му го врачи знамето на Бригадата.

Присуство на високи воени и дипломатски претставници

Како што се наведува во официјалното известување на воениот ресор, на свеченоста присуствуваа голем број високи домашни и странски гости, меѓу кои началникот на Генералштабот на Армијата, генерал-мајор Сашко Лафчиски, претседавачот на Секретаријатот на SEDM, амбасадорот Елефтериос Ангелопулос, како и замениците-министри за одбрана на Албанија, Пранвера Скана, на Бугарија, Љубомир Монов, и на Турција, Муса Хејбет. На настанот исто така беа присутни и заменици на началникот на Генералштабот од останатите земји-членки на Бригадата (Албанија, Бугарија, Грција, Романија и Турција), претставници на воено-дипломатскиот кор, како и претставници од Армијата и од Министерството за одбрана.

 

Back to top button