
Александар Зверев конечно го освои и УС Опен, откако во финалето во Њујорк го совлада Американецот Бен Шелтон со 3-1 во сетови (6-3, 7-6(2), 5-7, 6-2) и стигна до својата прва титула на Флешинг Медоус. Со овој триумф, германскиот тенисер го освои и вториот Гренд слем трофеј сезонава, по титулата на Ролан Гарос, потврдувајќи дека 2026 е најуспешната година во неговата кариера.
За 29-годишниот Зверев ова е втора Гренд слем титула во кариерата. Првата ја освои годинава на Ролан Гарос, а сега ја додаде и долго посакуваната круна од Њујорк. Пред ова финале, Германецот имаше пораз во финалето на УС Опен во 2020 година против Доминик Тим, но шест години подоцна успеа да го направи последниот чекор и да стане шампион.
Финалето траеше 3 часа и 36 минути. Зверев го доби првиот сет со 6-3, а потоа беше подобар и во тај-брејкот на вториот сет. Шелтон не се предаде и го освои третиот сет со 7-5, но германскиот ас брзо ја врати контролата во четвртиот сет и со убедливи 6-2 ја завери титулата.
Иако Шелтон имаше повеќе директни поени – 47 наспроти 35 – Американецот направи и значително повеќе неизнудени грешки, дури 47, додека Зверев запиша 30. Германецот беше особено ефикасен на првиот сервис, освојувајќи 85 проценти од поените по прв сервис (67/79), наспроти 71 процент кај Шелтон (62/87).
Клучна разлика направи и реализацијата на брејк-топките. Зверев искористи четири од шест шанси за брејк, додека Шелтон реализираше само една од трите можности што ги создаде. На втор сервис Американецот беше поуспешен со 57 проценти освоени поени, наспроти 49 проценти кај Германецот, но тоа не беше доволно за пресврт. Според официјалната статистика, Зверев покажа поголема стабилност во клучните моменти од мечот и заслужено стигна до трофејот.
Освен престижниот трофеј, новиот шампион ќе инкасира и рекордни 5,5 милиони долари, што е најголемата награда во историјата на Гренд слем турнирите. Финалистот Шелтон ќе добие 2,8 милиони долари. Вкупниот награден фонд на УС Опен 2026 изнесува рекордни 108 милиони долари, што е зголемување од 20 проценти во однос на минатата година.
Со триумфот во Њујорк, Зверев ја заокружи извонредната сезона во која освои два од четирите Гренд слем турнири и дополнително ја зацврсти својата позиција меѓу најдобрите тенисери на денешницата.
Ј. Ѓ.







