Суд во Истанбул осуди пет градоначалници од главната опозициска Републиканска народна партија, ЦХП, на затворски казни за корупциски дела поврзани со општински тендери, објавија Асошиејтед прес и повеќе турски медиуми. Најтешката казна ја доби поранешниот градоначалник на истанбулската општина Бешикташ, Риза Акполат, кој е осуден на 23 години и три месеци затвор.
Судот го прогласи Акполат за виновен за примање поткуп, перење пари и манипулирање со јавни набавки. Тој, сепак, беше ослободен од обвинението за членување во криминална организација, како и од дел од другите точки во обвинението.
Казни добија и градоначалници и поранешни градоначалници од Адана и Истанбул. Зејдан Каралар, градоначалник на Адана, е осуден на шест години и три месеци затвор, Оја Текин од Сејхан на осум години и четири месеци, Кадир Ајдар од Џејхан на пет години и десет месеци, а Утку Џанер Чајкара од Авџилар на шест години и осум месеци.
Судењето траеше околу седум месеци и опфати околу 200 обвинети. Предметот во турските медиуми е познат како случајот „Азиз Ихсан Акташ“, според бизнисменот за кој обвинителството тврдеше дека преку мрежа на компании добивал општински договори со поткуп, местење тендери и измами.
Сепак, судот не ја прифати централната теза на обвинителството дека постоела организирана криминална група. Сите обвинети за формирање или членување во таква организација беа ослободени од тие обвиненија, додека дел од нив беа осудени за поединечни корупциски дела.
Азиз Ихсан Акташ, кој првично беше претставуван како наводен водач на мрежата, соработуваше со обвинителството и даде искази против повеќе локални функционери. Турските закони овозможуваат поблага казна или други поволности за обвинети кои соработуваат со истрагата. Критичарите на процесот тврдат дека токму неговите искази и сведочењата на тајни сведоци биле клучни за случајот.
ЦХП оценува дека истрагите се дел од поширока политичка кампања против опозицијата. Партијата укажува дека општини управувани од владејачката Партија на правдата и развојот, АКП, кои исто така соработувале со компании поврзани со Акташ, не биле подложени на ист степен на истрага. Властите, пак, ги отфрлаат обвинувањата и тврдат дека судството во Турција е независно.
Процесот се одвива во период на силен судски притисок врз опозициски функционери. Поранешниот градоначалник на Истанбул, Екрем Имамоглу, е во притвор од март 2025 година и се соочува со посебно, големо судење за корупција. Тој и ЦХП ги отфрлаат обвиненијата и тврдат дека станува збор за политички мотивиран обид да се отстрани еден од најсилните противници на претседателот Реџеп Таип Ердоган.
Асошиејтед прес забележува дека судењето на петте градоначалници се следи внимателно и во поширок контекст, бидејќи ЦХП постигна силен резултат на локалните избори и ја зајакна контролата врз повеќе големи градови. Опозицијата смета дека серијата истраги, апсења и судски постапки што следеа потоа имаат за цел да ја ослабнат партијата пред следните национални избори.
