
Пратеничката од редовите на опозицискиот СДСМ, Јована Тренчевска, за време на денешната собраниска седница упати остри критики кон најавената реконструкција на владиниот кабинет. Според нејзините зборови, замената на неколку министри не претставува нов почеток, туку директно и јавно признание за двегодишниот економски и социјален неуспех на владеењето на ВМРО-ДПМНЕ, се наведува во соопштението од Центарот за комуникации со јавноста на СДСМ.
Тренчевска во своето собраниско обраќање посочи дека козметичките измени во министерските ресори не можат да ги прикријат неисполнетите ветувања, падот на животниот стандард и лошите економски показатели со кои се соочуваат граѓаните. Таа потенцираше дека по две години од преземањето на извршната власт, клучните економски столбови на државата бележат негативни трендови на штета на работниците, земјоделците и најранливите категории.
Лоши економски показатели и колапс на стандардот
Пратеничката од опозицијата презентираше детални статистички податоци за состојбите во земјата, правејќи јасен контраст помеѓу ветената владина програма и реалноста на терен.
„Пред две години беше ветувана нова ера, економски пресврт, намалени даноци и раст на БДП, како и годишна инфлација до 2,5%. Но, што имаме денес? Инфлација од 4,8% со тенденција да расте, а кај храната и над 10%. Сивата економија само во првиот квартал е зголемена за 4,3%, додека синдикалната кошничка изнесува скоро 70.000 денари. Имаме пад на странските инвестиции, пад на индустриското производство и пад на вработените во индустријата. Во исто време, според Државниот завод за статистика, сиромаштијата кај децата до 17 години изнесува 29,5%, а кај многучлените семејства дури 54,8%“, истакна Јована Тренчевска.
Таа додаде дека со предложениот ребаланс на Буџетот дополнително се кратат средства во износ од 50 милиони денари, со што ранливите категории, лицата со попреченост и давателите на социјални услуги се оставени без редовна исплата. Тренчевска го заврши говорот со став дека со оваа реконструкција не се менуваат владините политики, туку само се прераспределуваат фотелјите меѓу истите луѓе и нивните коалициски сателити, нагласувајќи дека државата не може да оди напред со „стара Влада во нова амбалажа“.
