ВЕСТИИМПУЛССПОРТ
Во тренд

УЕФА, КОНКАКАФ и АФК бараат одговорност и независна ревизија за Инфантино

Претседателите и генералните секретари на Европската фудбалска унија (УЕФА), Северно и Средноамериканската и Карипска фудбалска конфедерација (КОНКАКАФ) и Азиската фудбалска конфедерација (АФК) упатија заедничко отворено писмо до раководството на ФИФА. Во дописот, водечките луѓе на овие три конфедерации јавно го обвинија претседателот Џани Инфантино за загрозување на интегритетот на спортската игра, истакнувајќи дека довербата во него е целосно нарушена по обидот за спроведување на контроверзниот и сега веќе отфрлен предлог „Fifa Forward Enterprise“ (FFE), објави Си-Ен-Ен (CNN).

Во отвореното писмо, челниците на трите конфедерации директно го оспорија начинот на кој Инфантино управува со светската куќа на фудбалот.

„Водството во фудбалот не е сопственост. Тоа не е држење – или барање – моќ за да се владее. Тоа е должност за служење на фудбалското семејство кое му ја доделило довербата“, се наведува во писмото.

Понатаму, авторите директно го обвинуваат претседателот за нарушување на принципите, нагласувајќи:

„Кога довербата ќе се прекрши преку измама, кога поединецот ќе се постави над колективот што му дал авторитет, таа должност е напуштена.“

Поводот за оваа жестока реакција беше планот FFE, кој предвидуваше продажба на дел од комерцијалните и оперативните права за Светското првенство и за другите големи натпреварувања на приватни инвеститори.

Што се обидува Инфантино: Планот што предизвика бунт меѓу членките на ФИФА

Како реакција на ваквиот потег, УЕФА, КОНКАКАФ и АФК побараа итна и независна ревизија за да се испита како се управувало со овој проект, посочувајќи на недостатокот на транспарентност во Цирих.

„Има молк таму каде што треба да има одговорност, а дистанца таму каде што треба да има отвореност. Ова не се квалитетите што фудбалот ги заслужува во своето раководство. Затоа го заземавме овој став: не лесно и не сами, туку заедно, од должност кон играта на која ѝ служиме“, порачуваат конфедерациите.

Европа продолжува да врши притисок, а УЕФА дури сè уште се заканува со потенцијален бојкот на идните турнири организирани од ФИФА, меѓу кои е и Светското првенство за жени до 20 години кое треба да се одржи во септември.

Од своја страна, ФИФА во саботата објави официјално соопштение во кое ги критикуваше медиумските извештаи, нарекувајќи ги усогласен и тековен обид на одредени страни за поткопување на ФИФА и нејзиниот претседател. Иако светската централа претходно призна дека биле направени грешки и упати извинување за начинот на кој предлогот им бил претставен на членките, писмото јасно укажува дека извинувањето не е достатно. Писмото завршува со повик за промена на филозофијата на владеење:

„Силата на фудбалот секогаш била во неговото единство. Бараме тоа единство да се почитува сега, за раководство кое му служи на фудбалот, а не се обидува да командува со него.“

Сепак, Инфантино сè уште не е целосно изолиран и бара сојузници во овој длабоко поделен фудбалски пејзаж. Африканската фудбалска конфедерација (КАФ) му даде поддршка на претседателот на ФИФА во изминатите денови, а на негова страна застанаа и националните сојузи на Аргентина и Мексико. Сепак, одлуката на Мексико го истакнува нивото на поларизација, со оглед на тоа што оваа федерација се одвои од официјалниот став на нејзината матична конфедерација КОНКАКАФ.

Back to top button