ВЕСТИМАКЕДОНИЈА

Времето викендов во Македонија: До 41°C, потоа дожд и грмежи

Македонија ја очекува уште еден многу жежок викенд, но високите температури ќе бидат проследени и со услови за локална нестабилност, пороен дожд, грмежи, засилен ветер, а изолирано и појава на град. Според најновите податоци на Управата за хидрометеоролошки работи (УХМР), топлотниот бран ќе продолжи и во сабота, 22 август, додека од недела и почетокот на следната седмица се очекува постепено спуштање на температурите.

Во сабота ќе преовладува сончево и многу топло време со мала до умерена облачност. Во најтоплите делови од земјава температурата може да се искачи над 40 степени. Во попладневните и вечерните часови локално ќе има услови за развој на нестабилна облачност со пороен дожд, грмежи и засилен ветер.

Во недела, 23 август, и натаму ќе биде многу топло, но атмосферската нестабилност ќе биде поизразена. Локално се можни краткотрајни, но интензивни врнежи, грмежи, силен ветер и град. Температурите во најтоплите региони и натаму ќе се приближуваат до 40 степени.

Промената ќе биде позабележителна од понеделник, 24 август. Температурите ќе почнат постепено да опаѓаат, но времето ќе остане летно и топло. Во првите денови од седмицата локално сè уште ќе постојат услови за попладневна нестабилност.

Прогнозите на британската национална метеоролошка служба Met Office го потврдуваат трендот на постепено намалување на жештината. За Скопје се прогнозираат околу 37 степени во сабота, 36 во недела и 35 во понеделник, додека за Битола максималната температура од околу 32 степени за време на викендот би се спуштила на 31 во понеделник.

Во Охрид се очекува постабилно време, со температури околу 31 степен на почетокот на седмицата, а кон среда и четврток постепено намалување до околу 29-30 степени.

Според сегашните прогностички модели, во средината и втората половина од следната седмица жештината би требало дополнително да попушти, но без нагло заладување.

Back to top button