ВЕСТИВИДИГИТАЛИМПУЛССВЕТ

САД го забрани увозот на кинеските хуманоидни роботи, Пекинг реагира

Кина, која го снабдува најголемиот дел од светот со хуманоидни роботи, е отсечена од својот најголем извозен пазар откако американската влада презеде чекори за ограничување на зависноста од странска технологија.

Во вторникот, администрацијата на Трамп го забрани увозот на нови хуманоидни и четвороножни роботи од странски производители, наведувајќи дека тие претставуваат „неприфатливи ризици“ за националната безбедност на САД. Забраната исто така опфаќа и енергетски претворачи што се користат за поврзување на инфраструктурата за обновлива енергија и батериите со електричната мрежа. Овие нови ограничувања не ги опфаќаат моделите кои веќе се во употреба, пишува Си-Ен-Ен.

Безбедносни ризици и сомнежи за надзор

Федералната комисија за комуникации (ФКК) соопшти дека овие уреди можат да создадат ранливост во синџирот на снабдување и кибер-ризици за американската критична инфраструктура. Одлуката е заснована на проценка за национална безбедност донесена од страна на меѓуресорско тело свикано од Белата куќа. Според документот, роботите поврзани на интернет собираат податоци што можат да бидат искористени за надзор, засилување на капацитетите на странските разузнавачки служби или за далечинско преземање контрола врз нив.

Остра реакција од Пекинг

Портпаролката на кинеското Министерство за надворешни работи, Мао Нинг, изјави дека Пекинг се спротивставува на злоупотребата на концептот за национална безбедност од страна на САД за загрозување на кинеските компании и вети дека ќе ги преземе сите „потребни мерки“ за заштита на нивните интереси. Таа истакна дека протекционизмот не ја зголемува конкурентноста на САД, туку само им штети на американските бизниси и потрошувачи.

Влијание врз пазарот и кинеската индустрија

Кинеската индустрија за хуманоидни роботи брзо се разви во еден од најважните стратешки сектори во земјата, со повеќе од 140 производители. Според извештајот на платформата „LexisNexis“, шест од десетте водечки стартапи за хуманоидни роботи во светот, рангирани според патентите, доаѓаат од Кина.

Минатата година кинеските компании учествуваа со 90% во глобалните испораки на роботите, при што САД беа нивниот најголем прекуокеански пазар. Додека американските ривали како „Тесла“ (Tesla) и „Figure AI“ се мачеа со масовното производство, кинеските производители доминираа на пазарот. Аналитичарите наведуваат дека од оваа забрана корист ќе имаат американските компании како „Тесла“, „Figure“ и „Boston Dynamics“, додека за кинеските фирми ефектот ќе биде краткорочен и тие сè повеќе ќе се насочуваат кон европскиот пазар.

Редакција Брц

Поврзани вести

Back to top button