По неколку месеци шпекулации, следната дестинација на Мохамед Салах е конечно потврдена. Легендата на Ливерпул се согласи на двегодишен договор со турскиот Трабзонспор по истекот на неговиот договор на „Енфилд“, со што стави крај на една од најуспешните кариери во историјата на Премиер лигата, пишува Би-Би-Си Спорт.
Овој потег изненади многумина, бидејќи со години саудиските клубови го посакуваа Салах, а МЛС лигата исто така се сметаше за реална дестинација за една од најголемите ѕвезди во светскиот фудбал. Наместо тоа, 34-годишниот фудбалер остана во Европа и му се приклучи на Трабзонспор.
Останувањето во Европа како врвен приоритет
Парите не се единствениот мотив за одлуката на Салах.
Саудиските клубови долго време го сметаа Египќанецот за приоритетна цел, при што Ал-Итихад имаше доцен обид, додека Спортинг Канзас Сити од САД беше меѓу заинтересираните МЛС клубови. Двете дестинации можеа да понудат огромни финансиски награди, но Салах одлучи да остане во европскиот фудбал.
Трабзонспор потврди дека Салах ќе биде платен 14,5 милиони фунти по сезона и ќе добива 20% од приходите од продажбата на производи со неговиот бренд.
Во турските медиуми се појавија и извештаи дека договорот до јуни 2028 година вреди околу 7,3 милиони фунти по сезона, но со дополнителни бонуси и процент од продажбата на артикли со неговото име.
За играч кој му помогна на Египет да стигне до нокаут фазата на Светското првенство ова лето, можноста да продолжи да се натпреварува во натпреварувањата на УЕФА очигледно имаше големо значење.
Зошто токму Трабзонспор?
Ако Салах бил одлучен да остане во Европа, Трабзонспор можеби не бил најочигледниот избор. Традиционалните гиганти во Турција се Галатасарај, Фенербахче и Бешикташ.
Бешикташ навистина се обиде да го потпише Салах, но преговорите пропаднаа поради финансиската структура на договорот, што му ја отвори вратата на Трабзонспор.
Иако го немаат глобалниот профил на најголемите турски клубови, Трабзонспор се далеку од аутсајдери.
Тие се седумкратни шампиони на Турција, ја освоија Суперлигата во сезоната 2021-22 и го подигнаа турскиот Куп минатата сезона.
Тимот на тренерот Фатих Теке заврши на третото место во лигата, со што обезбеди пласман во плеј-офот за Лига Европа. Победа во овој двомеч ги води во лигашката фаза, додека пораз ги испраќа во Конференциската лига.
При официјалната промоција, Салах накратко го носеше симболичниот дрес со број 61, кој претставува регистарска ознака на градот и има посебно значење за навивачите кои традиционално ја слават 61-та минута од натпреварите. Сепак, за сезоната 2026-27, тој ќе ја носи „десетката“, откако соиграчот Ернест Мучи се согласи да му ја отстапи во знак на почит кон најголемото засилување во историјата на клубот.
Турската лига како магнет за елитните играчи
Трансферот на Салах е најновиот знак за растечката привлечност на турскиот фудбал за етаблираните ѕвезди.
Виктор Осимхен, Лерој Сане, Илкај Гундоган, Нејтан Аке и Леандро Тросар се меѓу познатите имиња кои сега играат во Суперлигата.
Самиот Трабзонспор веќе ги има Андре Онана, Руслан Малиновски и Стефан Савиќ во својот состав.
Минатото лето, Суперлигата го забележа третиот најголем нето-трошок за трансфери во светскиот фудбал, заостанувајќи само зад Премиер лигата и Саудиската Про лига.
Економијата зад ова трошење е специфична: најголемите турски клубови генерираат значителен приход во евра преку УЕФА, додека многу домашни оперативни трошоци остануваат во турски лири.
Продолжениот период на висока инфлација во земјата ја намали релативната вредност на постоечкиот домашен долг, давајќи им на клубовите поголема флексибилност отколку што изгледа на прв поглед.
И покрај овие инвестиции, компанијата Опта моментално ја рангира Суперлигата како 14-та најсилна домашна лига во светот, зад првенствата во Данска, Полска, па дури и англискиот Чемпионшип. Од успехот на Галатасарај во Купот на УЕФА во 2000 година, само еден турски клуб има стигнато до полуфинале на големо натпреварување на УЕФА.
Што може да се очекува од Салах на теренот?
Возраста сугерира дека Салах влегува во залезот на кариерата, но тој сè уште докажува дека има што да понуди.
Тој го инспирираше Египет до нокаут фазата на Светското првенство во 2026 година, со еден гол и две асистенции во пет настапи.
Неговата последна сезона во Ливерпул се покажа како потешка, откако бранителот на титулата во Премиер лигата падна на петтото место. Салах постигна 12 голови во сите натпреварувања откако падна во втор план под водство на Арне Слот.
Сепак, само една година претходно (во сезоната 2024-25), тој испорача една од најдобрите индивидуални кампањи во својата кариера, постигнувајќи 34 голови и 23 асистенции кога Ливерпул ја освои титулата во Премиер лигата.
Трабзонспор се очекува веднаш да го изгради својот напад околу него. Тимот на Текке типично игра во формација 4-2-3-1, каде Салах ќе ја заземе својата позната позиција на десното крило, влегувајќи кон внатре на својата посилна лева нога. Теке може да се префрли и на 4-3-3 без значително да ги промени одговорностите на Салах.
Неговото деби би можело да се случи на 15 август, кога Трабзонспор ја отвора кампањата во Суперлигата на гости кај Касимпаша, пред плеј-офот во Лига Европа против унгарскиот Ференцварош или полскиот Горник Забже. За Трабзонспор, овој трансфер веднаш го подигнува глобалниот профил на клубот, ги зголемува комерцијалните можности и носи еден од најмаркетиншките фудбалери во модерната ера.
Ј. Ѓ.



