Андовски најави изградба на нова болница во Кичево вредна 22,5 милиони евра

Заменик-министерот за здравство, Јовица Андовски, заедно со градоначалникот на Општина Кичево, Александар Јованоски, директорката на Општата болница, Маја Цветановска Трајковска, и делегација на Светска банка, ја посетија кичевската болница каде го разгледаа концептот за изградба на нов и современ болнички комплекс, соопштуваат од Министерството за здравство.
Планираната инвестиција за новиот здравствен објект е проценета на околу 1,38 милијарди денари, односно 22,5 милиони евра. Според заменик-министерот Андовски, новата болница треба да стави крај на долгогодишната неизвесност и да обезбеди трајно решение за градот.
„Кичево со децении се соочува со несоодветни болнички услови. Време е овој проблем да добие трајно и функционално решение. Целта е граѓаните да добијат сигурна здравствена грижа во својот град, а здравствените работници современи услови за работа“, изјави Андовски.
Новиот комплекс ќе располага со современи простории за дијагностика, болничко лекување и ургентна нега, како и системи за медицински гасови и енергетски ефикасни решенија. Со реализацијата на овој проект, болницата ќе обезбедува услуги за граѓаните на Кичево и околните населени места, со што значително ќе се намали потребата пациентите да патуваат за здравствени услуги во Скопје, Охрид и Битола, се наведува во соопштението.
