ВЕСТИСПОРТ

Македонија со рекордна делегација на Медитеранските игри во Таранто

Италијанскиот град Таранто од денеска е центарот на медитеранскиот спорт, каде што Македонија ќе настапи со 88 спортисти во 19 од вкупно 33 спортови на програмата. Како што информираат од Македонскиот олимписки комитет (МОК), националната делегација вчера пристигнала во градот домаќин, подготвена за предизвиците на XX Медитерански игри „Таранто 2026“.

Во Олимпиското село, македонските претставници денеска остварија средба со претседателката на државата, Гордана Силјановска-Давкова, која им посака успешни настапи и изрази надеж дека со својата борбеност достоинствено ќе ги претстават македонските бои.

Од олимпискиот комитет најавуваат дека свечената церемонија започнува вечерва во 20 часот и ќе се емитува во живо на МРТ 1, додека дел од натпреварите ќе бидат пренесувани на МРТ 3. Игрите ќе траат до 3 септември, а спортската приказна веќе ја отворија македонските одбојкарки, кои вчера го одиграа првиот натпревар и загубија со 3:0 од силната репрезентација на Турција.

Во следните денови, македонските бои ќе ги бранат спортисти во атлетика, бадминтон, бокс, велосипедизам, коњички спортови, мечување, ритмичка гимнастика, џудо, карате, стрелаштво, пливање, таеквондо, тенис, триатлон и борење (слободен стил). Како што се наведува во најавата, екипните спортови ќе бидат претставени преку женските репрезентации во ракомет и одбојка, машката репрезентација во баскет 3х3 и машката фудбалска репрезентација до 21 година.

Ова е најбројната македонска делегација досега, составена од вкупно 130 членови. Од МОК потенцираат дека спортистите настапуваат во официјална опрема на ЈОМА, а покрај логистичката поддршка, за нивната ментална подготовка и справувањето со притисокот е задолжена сертифицираната тренерка Софија Арнаудова. Јавноста ќе може секојдневно да се информира за резултатите преку официјалните профили на МОК.

Ова е четврто учество на Македонија на Медитеранските игри како независна држава, а националниот тим досега има освоено 14 медали.

Back to top button