Глобалните берзи во слободен пад по распродажбата на акциите за вештачка интелигенција на Волстрит
Азиските и европските пазари бележат значителни загуби откако загриженоста за „балонот“ на вештачката интелигенција предизвика еден од најлошите денови на американската берза во последната година.

Глобалните акции забележаа остар пад во петокот, следејќи ја масовната распродажба на акциите поврзани со вештачка интелигенција на Волстрит. Берзите ширум светот се под сериозен притисок поради континуираниот пад на компаниите кои досега бележеа астрономски раст благодарение на бумот во ВИ индустријата, за кои критичарите веќе подолго време предупредуваат дека се преценети и претставуваат класичен „балон“.
Во раното тргување во Европа, францускиот индекс CAC 40 загуби 1,1%, германскиот DAX падна за 1,5%, додека британскиот FTSE 100 се намали за 1,4%. Во САД, фјучерсите укажуваат на мешано тргување, при што Dow Jones бележи пад од 0,8%, додека оние на S&P 500 благо пораснаа за речиси 0,3%.
Најсилен удар претрпеа азиските пазари. Јапонскиот индекс Nikkei 225 потона за 6,0%, паѓајќи под границата од 60.000 поени за првпат по речиси половина година, а меѓу најголемите губитници беа технолошките гиганти како „SoftBank Group“ и „Advantest“. Во Токио, акциите на „Toyota Motor“ исто така значително паднаа по објавувањето на слабите профити ден претходно. Јужнокорејскиот Kospi забележа вртоглав пад од 6,0%, предводен од огромните загуби на „Samsung Electronics“ и „SK Hynix“. Падови бележат и австралискиот S&P/ASX 200 (-0,5%), хонгконшкиот Hang Seng (-1,3%) и кинескиот Shanghai Composite (-1,1%).
Во врска со неизвесноста што следува, Ипек Озкардескаја, виш аналитичар во „Swissquote“, изјави: „Секако, распродажбата кај компаниите кои толку долго го отвораа апетитот на инвеститорите би можела да создаде можности за купување со попуст“.
Четвртокот беше најлошиот ден за Волстрит откако американскиот претседател Доналд Трамп ги потресе светските пазари во април 2025 година со неговите царини за „Денот на ослободувањето“. Овој пад целосно ги избриша добивките од претходниот ден.
Истовремено, на енергетските пазари, американската сурова нафта падна за 0,99% на 89,62 долари за барел, додека нафтата Брент се намали за 0,93% на 97,38 долари, поради континуираната неизвесност околу војната со Иран. Во валутното тргување, американскиот долар зајакна на 158,14 јапонски јени, додека еврото благо падна на 1,1182 долари.










