
Американскиот државен секретар Марко Рубио денеска вети дека САД нема да сторат ништо што би ја поткопало безбедноста на американските сојузници во регионот на Персискиот Залив кога станува збор за односите на Вашингтон со Иран.
„Ќе бидеме целосно усогласени со нашите партнери во Заливот. Затоа сум тука“, рече Рубио во Кувајт пред да замине за Бахреин.
„Нема да направиме ништо што би ја поткопало безбедноста на нашите долгогодишни сојузници во регионот“, рече Рубио.
Врховниот американски дипломат е на турнеја низ три земји од Персискиот Залив, обидувајќи се да ги смири сојузниците кои го сметаат предложениот мировен договор со Иран за премногу мек кон регионалната сила што ги нападна во војната.
По разговорот со лидерот на Обединетите Арапски Емирати претходно денеска, Рубио се сретна со кувајтските лидери пред да замине за Бахреин.
Договорот меѓу САД и Иран постигнат минатата недела, прв потпишан од американски и ирански претседател по Исламската револуција на Иран во 1979 година, вклучува предложен фонд за реконструкција од 300 милијарди долари и укинување на некои санкции.
По потпишувањето на меморандумот за разбирање минатата недела, двете страни започнаа технички разговори за да се договорат за точната имплементација на договорот.
„Доколку Иран сака да добие добар и вистински договор, САД се отворени за тоа. Ако не го сторат тоа, тогаш секако претседателот има опции“, рече Рубио.
Тој додаде дека техничките преговарачи ќе ги продолжат разговорите на крајот од месецот и дека веројатно повторно ќе одат во Швајцарија.
